Delhi nung swine flu agi shiranger 40 jungogo

New Delhi, January 19 (Agencies): Taküm küm tenzüker yashi Hombarnü tashi nung linük yimtiba Delhi nung swine flu ajanga shiranger nisung 40 ajungba osang tanü Delhi sorkari health ketdangser kati metetdaktsüogo.
“Taküm küm yimti tesem balala nung swine flu ajanga nisung 40 shirangba onoki jangjaogo,” ta ketdangseri ashi.
Tang tashi nungbo iba tashitak ajanga asüba osang mali saka 2015 kümbo iba wara ajanga nisung 12 süogo aser nisung 4,000 dak tema shiranga liasü.
2015 küm India linük nung iba tashitak ajanga nisung 1,994 tashi asü aser nisung 33,000 tashi shiranga liasü.
Swine flu mesüra H1N1 ta ajaba tashitak ya aketba, hachiba mesüra tangshitepba ajanga menateper.