Delhi nung ‘Tajung Samaria’ maliba ajanga nisung ka azü yimdoka asü

Telongtet noksa nung yirua alisang aser tsünglanglen noksa nung yirua alisang indang phone auyasang noksa angur.

New Delhi, August 11 (Agencies): Brihostibar anepdang Delhi nung delivery van gari kati security guard ka dak tsükokja kanga mejungi yirua alidang yimti lenmang nung tajung Samaria maliba ajanga pa azü yimdoka süogo.
Delhi, Hari Nagar tesem nung pa yirur alidang nisung aikati pa süiaka shingaia pa meyari, aser parnok rongnung nisung katibo yirua alisang indang mobile phone bener aoba CCTV nung angu, ta police-i ashi.
Item tatalokba ajungaji Meraj Cinema hall anasa aliba CCTV camera ka nung tangoka liasü. Arishi küm 35 Matibul dak delivery van kati atsük, ta parnokisa ashi.
Tanep 3:00 ako meta Matibul ji par kidangi aodang iba lendong atalok. Gari jagi pa dak tsükoktsüba sülen pa lenmang nung yirua ondak, iba sülen pa süia aor shingaia pa meyari, ta police ketdangser kati ashi.
Kasa CCTV ajanga rickshaw atsüer ka pa anasai oa pa indang phone ji bener ao, ta ketdangserisa ashi.
Asürji West Bengal nungi lir aser pa Tihar yim anasa para kidang telidak liasü.
Police-i ashiba agi, tanep 7:00 ako meta parnok dangi nisung ka lenmang nung ondaka aliba osang aru, iba sülen parnoki tasümangji postmortem agitsü atema bener ao.
Tang van gari anisangji tebushidak lir, ta police-isa metetdaktsü.
Ano külen tanü iba tatalokba sülen Delhi sorkari kobi melii Cabinet nung ‘Good Samaritan Policy’ benoktsü ta metetdaktsüogo.
Delhi Health minister, Satyendar Jain-i, “Iba scheme kübok lendong nung alir yarirtem nem senotsü agütsütsü,” ta ashi.
Jain-i, “Nisungtemi yaritsü memelunger, kechiyong parnok lendongi aitsü mesüra police-i amokmerentsü tsübur. Ajisüaka Supreme Court tetuyuba ka ajanga lendong ajurua alir yarirtem dang asüngdangya masütsü mesüra amokmeren masütsü tuyua lir. Onoki senotsü teyari scheme ka tenzüktsü, koba ajanga (tajung Samaria) auto aser taxi anishirtem densema tangartem nem senotsü agütsütsü,” ta metetdaktsü.
Tajung Samaria tem nem shisa tajung agütsütsü atema sorkari mongintemi akümba luden ka tentettsü, aser iba atema helpline number ka tenzüktsü, ta minister-isa shisem.