Delhi nung tanur jenti tepsetsang Ravinder-i aibelen nangzükogo

New Delhi, July 20 (Agencies): Arishi küm trok tetsür chanu ka tepsetba ken o nung temulung melemi taoba hopta Ravinder Kumar (23) South Delhi nung pua liasü, aser pai police dang tanurtem mesüzükba aser tim masüba mapa inyakba aika asükshijang merongtsüsa nangzükogo.
Police-i asüngdangyaba mapang Kumar-i, pai tanurtemji nanglong agi mesüzük aser shi nung medemtsü asoshi parnoki memulungra parnok tepseter tasümang denji shi nung medem, ta shiogo. Iba dang ya shisatsü meshitakba ‘necrophilia’ mesüra tasümang den shi nung medemtsü jangraba yimya ta ajar.
Pa den par medemertemi 2008 aser 2015 küm tsüngda Delhi aser Uttar Pradesh nung tanurtem apuba sülen shi nung medemogo aser tanur 15 shi tepsetogo, aser Kumar-i ibaji police dang nangzükogo.
Paisa nangzükba agi, pa kodang yi jemdir pa khenyongi nisung balaka akümer aser par medemer Dharmender aser Kishan na den külemi jabujariba video-sa reprang.
Iba sülen parnoki tanurtem aputsü, tashiyim agi medemtsü aser tesüsa tepseta liasü.
Pa arishi küm 17 asüba mapang pai mezüng aayanger ka jala raksatsüba sülen tepset, ta pai nangzükogo.
2009 küm nunga Ravinder-i aayanger ka jabaso apuba sülen shi nung medem aser tepset, iba ken oji ka benoka liasü saka tenük kuli aser kuli peria maliba ajanga ozüng tsüngdang pa jenbua liasü.
Iba sülena pai nisung 11 tepsetba nangzükogo.
Tanurtem aikati pa den medemtsü memulung, anungji pai tepseter parnok den medem, saka tanur jagi iba tatalokbaji shinga danga mashitsü ta nangzükra pai metepseti toktsü.
Ano 2013 küm pa transport company ka nung gari merükba mapa inyakba mapang pai tanur ana tepsetba nangzükogo.
Osangbenertem den jembiba mapang DCP (outer) Vikramjit Singh-i, Ravinder Kumar indang shisatsüji jangjatsü asoshi psychologist nem pa tekolok tendangdaktsütsü, ta ashi.
Ano külen pai nangzükba nung ajemdaker police-i par medemer anaji bushi tenzükogo.
Ravinder Kumar apuba aser pai nangzükba ya ajanga 2005 aser 2006 küm Noida nung Surinder Koli-i tetsür tanur aika tepsetba tatalokba yimdangi arur.