Delhi nung tebur 5-i US tsür ka tashiyim amshia taküm raksatsü

New Delhi, December 03 (Agencies): Delhi nung aliba Connaught Place nung tebur pongui US tsür ka tashiyim amshia raksatsü, ta tetsürla jagi tai tonglokja lir.
Police-i ashiba agi, Connaught Place police station nung ken o ka agüja lir aser mezüng bushisüngdang tenzükogo, ta metetdaktsü.
US tsürla jagi email ajanga Delhi police dang, la indang hotel takdang nung la tourist guide densema tebur pongui la dak tashiyim mapa inyak, ta ashi.
Laisa, 2016 küm March ita tetenzüklen la tourist visa bener Delhi-i aru aser Connaught Place anasa five-star hotel ka nung anenzüka liasü, ta ashi.
Hotel ketdangsertemi tuyuba nung ajemdaker lai agency ka dang nungi tourist guide ka hire asü. Kenü anogo la indang tourist guide jagi par medemer pezü anisemer sentong yanglutsü atema hotel jagi aruba sülen parnok ajak yi ajem, iba sülen parnoki melentepa la dak tashiyim mapa inyak, ta laisa ashi.
Iba tatalokba ajanga aoksar idangyongjisa lai India doktsür United States-i ao.
Tetsürla jagi ashiba agi, lai item tatalokbaji lar kinüngertem dang mashi aser iba mapang nungjagi la tejashi nung dang alir. Tesülen melungtet telok kati la dang, police commissioner dangi email ajanga ken o agutsütsü atema shisa agütsü.
Osangbenertem den jembidang police-i, hotel records nungi tourist guide sangji jangjatsü atema inyakdar aser Delhi Police-ia US embassy dang tetsürla osangtem tejangja meshiba den külemi lai India semdangba kuli agüjang ta mepishiogo, ta metetdaktsü.
FIR benokba sülen la Delhi-i arua kuli agütsütsü, ta lai shiogo.
Iba osang angazüka External Affairs Minister, Sushma Swaraj-i, aibelenertem pua temerenshi agütsütsü atema sorkari inyaktsü, ta ashi.
Swaraj-i twitter ajanga, “Taküm March ita nung tebur telok kati Amrerica tsür raliwalir ka tashiyim amshia raksatsüba osangji ni media ajanga angashiogo. Ni Delhi Lt Governor den jembiogo aser pa dang Police-i ken o ka benoktsü aser aibelenertem aputsü tuyuang ta shiogo. Ni US nung Indian Ambassador danga tetsürla denji tongtepratepa la dang aibelenertem memerenshi ang malitsü ta shiang ta mepishiogo,” ta metetdaktsü.