Delhi nung tetsür ashioktsür Nigeria nunger 8 apu

Hyderabad, Oct. 13 (Agencies): Delhi nung alir tetsür ka dang la den kibong akümtsü ta shia sen lakh 5.4 külakzüka agiba dak sentakba nung Nigeria nunger ti pua lir, ta Cyberabad police-i Mongulbar nü ashi.
Cyberabad Police indang kongsang ‘cyber crime’ teloki iba mapa tamajung inyakba nung tanishir ana Udunna Chukwuma Collions aser Adevayo Olabanji na den ano parnok trok densema pua lir.
Tetsürla jagi la dak atalokba otsü police dang August ita nung shia ken o benoka liasü. Lai ashiba agi, ‘Simply Marry’ matrimonial website nung la indang temetettsü ajak inokja lir.
‘Simply Marry’ website nung dena alir rongnung ka, Garry Philles-i 2014 February ita nung la dang kibong akümtsü asoshi asüngdang. Tena tsüngda email address lemsatepa tena taküm aser kibong otsü lemsatepa liasü, ta police-i ashi.
Garry Philles ji tangar masü saka parnok ti rongnung tanishir Udunna liasü. Tena jembiba mapang la dang, Udunna-i, pa Delhi Metro nung civil consultant ama inyaker aser taküm March ita nung contract temer Florida, US-i meyipa aotsü, ta ashiba police sangdong ka ajanga metetdaktsü.
“Pa US-i oa adianutem den kibong akümtsü asoshi sentong meyanglu tsüngda la den ajuruteptsü tejangraba sayua lar kinunger den Hyderabad nung ajuruteptsü ashi,” ta police-i ashi.
Tetsürlaji April, 2015 nung UK-i oa liasü aser iba mapang lai pa dang yangji ajuruteptsü ashi, ajisüaka pai majurutet anungji la UK nungi India-i June ita nung meyipa aruba sülen ang tena India nung ajuruteptsü bangjemtep.
Aji oda süaka pa India-i aruba mapang sen aika den sempet aser senti oset aika bena aliba ajanga Customs officer temi pua lir ta telephone ajanga ashi.
“Anungji pa iba tatalokba nungi jenteta tena anema case mebenokdaktsütsü mechi lai sen agütsütsü nüngdaker ta tetsürla nem amangdaktsü,” ta police-isa ashi.
Iba mapang Adevayo Olabanji-i pa RBI nung inyaker ta shia la dang sen lakh 5.4, tang pua alirtemi agütsüba bank account tem nung enokdaktsü.
Ita ishika iba tataloka nung bushisüngdanga arur külen Delhi nung October 8 nü parnok ti ya apu. Parnok den külemi sen crore 10 alang pseudo-ephedrine drug seret 10.6 bena aliba ajanga Nigeria nunger Chigozie John-a pusem.
Parnok shinga ket nunga passport aser visa shitak maliasü, ta police-i ashi.