Delhi nung tetsür ka tsüngset

New Delhi, September 21 (Agencies): Mongolbar anepdang North Delhi, Burari lenmang nung tebur kati arishi küm 21 tetsür tesayur ka dak techira oset kati 22 ben atsüngba sülen shingaia la meyarii toktsüba ajanga azü yimseta asü.
Iba noksaji anasa aliba CCTV camera ka ajanga tangoka liasü. Iba tatalokba sülen Centre-i Delhi Police dang iba osang tejangja meshiogo, ano külen Aam Aadmi Party-i iba maongka agia Delhi Lt Governor (LG), Najeeb Jung aija, iba tatalokba ajanga linük yimtiba nung tzüzüng-ozüng maliba kuli sayur, ta aitsü.
Novel Riches School nung tesayur, Karuna Kumar ji  Surender Singh (34)-i tesüiba küm ka ser tesadang tashi anishia liasü.
Mongolbarnep 9:00 ako meta Karuna aser lar kinünger ka na mapai aoba mapang Surender-i kenji (scissors) agi la dak aiben atsüng, ta police-i ashi.
Iba sülen tebur kati la kümzüktsü aru, saka pa yirutsü tsübuba ajanga toktsür ao. Minute ana ser tesadang tsüngda Surender-i la dak 22 ben atsüng, saka lenmang nung alirtemi repranga dang ata.
Karuna ji Sushrut Trauma Centre-i anir ao, saka la tasü bener aru ta ashi. Tesülen yangji alirtemi Surender dak azük aser police ket nung agütsü.
Police-i ashiba agi, Surender meyong training centre ka nung la computer training agidang pai la meimadok. Iba sülen pai kibong akumtsü la dang aiben asüdang, ajisüaka lai magizüki liasü.
Surender anema ken o ka benokogo, ta DCP (North), Madhur Verma-i metetdaktsü.