Delhi nung tetsür kati tashiyim agi tebur ka den shi nung medemtsü merangba atema apu

New Delhi, July 16 (Agencies): South Delhi nung arishi küm 32 tain tetsür kati tebur ka tashiyim agi raksatsütsü merangba ajanga Brihostibar nü Delhi police-i tetsürlaji puogo, ta police-i ashi.
Renu Lalwani yagi autorickshaw anishir ka den tashiyim agi shi nung medemtsü merangba ajanga police-i apu.
Arishi küm 41 tain, Umesh Prasad-i ashiba agi, Mongulbar nikongdang, Saket tesem nung Renu Lalwani den lar medemtsür kati pa meyong auto hire asü aser kilometre tenet pilar aliba Arjun Nagar-i anir ao.
Arishi küm 32 tain tetsür jagi Prasad nem taa agütsütsü amai ser Arjun Nagar nung aliba lar ki telungi jaok. Pa nem tzü tajemtsü agütsür külen lai kiji telunglen nungi kara-kara shidanga ayu aser iba sülen pa den shi nung medemtsü asoshi merang saka Prasad-i memulung, ta police-i ashi.
Safdarjung Enclave police station nung inspector, Vishuddhanand Jha-i, “Iba sülen tetsür jagi Prasad nem yi agütsü saka pai ajia magizük. La jashiba agi pa dak pungloka tola shisatsü aser tebang mesep. Item tatalokba ajak ya lar medemtsürla jagi video tangoka liasü,” ta IANS dang ashi.
Police ketdangsertemisa ashiba agi, ghonda ka shi lir külen tetsür anaji takdang telungbai ia sensak asemdang Prasad-i kichiba nungi pungzüka ao aser iba mapang pa tetsüngret sükdang.
Video tangokla Lalwani’er medentsürlaji Tanzania nungi lir aser la ano police-i mepushii jenshidar. La tenüngji Hitija ta jangjaogo.
Police-i Lalwani aliba kidang nungi auto anishir meyong badge pezü aser driving license pezü nguteta lir. Bilemba agi tamalena tena yagi auto anir tangar dakasa tashiyim mapa inyaker alitsü südi.