Dimapur, February 5 (TYO): Hokolbarnep Delhi kübok Daryaganj tesem nung mejangjatetba tetsür ka tasümang anguba sülen osang tai prokshia nübortem kanga ratadaktsüogo.
Asür tereprangtsüji north east nung alir jakyim mesüka liasü aser laji Yaongyimsen tsür Mrs. Tsuktirenla ta osang prokshi. Lar kinüngertemi osang sangoktsüba sülen Delhi nung aliba Aor telok balalai la mang police ket nungi agizüka anepalutsü atema mapa inyaktsü tenzük. Ajisüaka, tatem nungbo asürji Mrs. Tsuktirenla masü tangar ka ta jangja.
Tanep 6:00 ako meta Darya Gunj, Delhi nung tasümang ka bosta nung seper jana endokdak endoka aliba jana bendener kari ngua Delhi police nem osang agüja liasü, ta Supongchiten, Founder Director, Divine Bridge Ministries, New Delhi-i sangdong ka nung metetdaktsü.
Mapang tatsüka tsüngda nung iba osang alima ajunga süngadok aser social media ajunga nung prokshi. Bushitepa ao nung iba tasümang ya Mrs. Tsuktirenla, Yaongyimsen tsür ta kinunger nungi osang aru, anungji Delhi nung aliba asen Ao Kaketshir Telongjem, NAP, Delhi Ao Senso Telongjem aser Divine Bridge Ministries tasümang yua alidak Darya Gunj Police station-i oa osang agitepa yaritepa liasü, ta sangdong nung shia lir.
Kinungertem dangi osang yok aser parnok nungi iba tasümangji par jala ta tejangja osang aru nung aser Delhi nung aliba kinungertemia kuli tejangja agütsü nung FIR agüja teinyaktsü mapatem inyak, saka tanü nikongdang 5:00 ako meta ka iba tasümangji Mrs. Tsuktirenla masü ta osang aru, ta Supongchiten-i sangdong nung metetdaktsü.
Delhi nung aliba asen Aor nüburtem aser police bo kinunger nungi osang tai aruba yong nübu, rongsen aser timtem jenti aika agiba den shisatsü ajunga ramaa timtemogo. Iba den külemi asen Aor/Naga nunger tenünga menüktsüa liasü, ta paisa sangdong nung shia lir.
Ano külen, Delhi Ao Students Union (DASU)-ia nübortem dang WhatsApp amala social media sabang tim mesüi mamshitsü atema mepishia metetdaktsüogo.
Hokolbarnep Delhi nung Aotsür ka tasümang angu aser la mangji morgue nung yua lir ta osang prokshi. Ajisüaka parnok morgue tonga orr reprangdangdang tasürji tangar ang ka liasü, ta DASU Tir, Talimoa Longkumer-i phone ajanga osangbener den jembidang ashi.
You must be logged in to post a comment Login