Delhi nungi Northeast renlokdaktsütsü makok : PM Modi

New Delhi, July 26 (Agencies) : Delhi nungi linük kübok northeast tesem renlokdaktsütsü makok aser iba jagi pai centre sorkar ketdangsertem tesem tonga yoker, ta Prime Minister Narendra Modi-i Deobarnü ashi.
“Delhi nung mener northeast renlokdaktsütsü akoktsü na? Masü! Ketdangsertemi semdangtsü aser parnoki terenlok mapa ketdang asütsü” ta Modi-i `Maan Ki Baat` radio sentong nung ashi.
Centre nungi ketdangsertemi northeast nung aliba district aser yimtsüngtem semdangtsü aser idakji mungzüka nübortem indang khuret metettsü atema sensaksemtsü, ta Modi-isa ashi.
Linük nung yimtsüng tia nung aliba tesemtem nung electricity agütsütsü atema Modi-i jembidang, par sorkari yimtsüng ajak nem electricity agütsütsü nangzüka lir ta ashi.
“Asen linük renlokdaktsütsü süra yimtitem nung facility agütsübatemji yimtsüng nung alirtemia nüngdaker” ta paisa ashi.
Modi-isa higher education jenjang nung kaketshirtemi science azüngtsü mejangraba atema tebilemtsü khuret abenba lemsatep.
“Kaketshir 100 rongnungi kaketshir ka mesüra anati dang science azünger. Iba ya tebilemtsü khuret ka lir. Kaketshirtem dang science azüngtsü ajungshitsüla” ta prime minister-isa ayongzük.