Delhi Police Commissioner-i SC tetuyuba mezüngshi: Kejriwal

Arvind KejriwalNew Delhi, February 17 (Agencies): JNU ken o nung Patiala House Court nung obendangertemi osangbenertem aser kaketshirtem dak teka sangshiba mangatettep adokba sülen Bodhbarnü Delhi chief minister, Arvind Kejriwal-i, Delhi nung tensa kanga kara tamajungba akümer, ta ashi.

Kejriwal-i, “Linük yimtiba tensa atema o lemteptsü asoshi ni Tir, Pranab Mukherjee dang mapang agüjang ta mepishiogo,” ta metetdaktsü.

Paisa, JNU lenir Kanhaiya Kumar o akadak, Patiala House Court nung tensa azüoktsü atema Supreme Court-i tuyubaji Delhi Police Commissioner B.S. Bassi-i jakdaka mezüngshi, ta aitsü.

“Delhi Police-i jakdaka SC tetuyuba mezüngshi. Bassi-i akhanga meinyaker. Par (Bassi) kiburtemi pa nem tetuyuba kechisa agüja ali(?)” ta Kejriwal-i asüngdang.

Linük yimtiba nung Delhi Police ya Union Home ministry kübok lir, aser mapang aben Kejriwal-i Delhi Police tashimaitba indang aija arur.

You must be logged in to post a comment Login