Delhi Police-i azü tepseter ka bushidar

New Delhi, March 21 (Agencies): Delhi South district police-i yimti lenmang nung azü tepseta senzür tebur ka bushidar, iba den külemi melungtet telok (NGO) katibo aibelensang apur nem mesüra osang agütsüteter nem senpet lakh 1 agütsütsü, ta social media ajanga sangdongogo.

Deobarnü police ketdangsertemi ashiba agi, parnoki police team ana lemsar aibenlensangji tang tebushitak lir, iba den külemi jacket aser half pant sema alisangi azü tepseta senzüba video jia parnoki prokshiogo.

Anepdang yakta South Delhi nung aliba Green Park metro station nung aliba dokan ka nung CCTV camera ajanga tangokba minute 18 video nungji arishi küm 20 ser tema lanur kati chiyungtsü agi lenmang nung nemzüba azü asem den azü chanu ka mesüzükba sülen kotari agi tsüngsetba noksa lir.

Iba dak sentakba nung Hauz Khas police station nung mejangjaba nisungbaji anema Prevention of Cruelty Against Animals Act kübok IPC sections 428 aser 429 nung ken o benokogo, ta police ketdangser kati ashi.

Kasa tesem nung kasa tatalokbatem osang lir, aser itemji-a kasa nisung-isa inyak asü masü’ar police-i bushisüngdangdar, ta paisa ashi.