Delhi Police-i Kanhaiya nem bail agütsütsü nokdanger

Delhi, February 23 (Agencies): Delhi Police commissioner BS Bassi-i, mezüngbo Kanhaiya Kumar nem bail agütsütsü menokdangtsüla ta ashi ajisüaka Mongulbarnübo pai meyiper Jawaharlal Nehru University students union Tir mechioktsüla, ta o melenshia shiogo.

“Tensa balaka kümogo, Kanhaiya nem bail agütsür pa temai adok nungbo iba tatalokba küli aser bushisüngdang maparen nung timtem bener arutsütsü,” ta Mongulbarnü Delhi Police commissioner BS Bassi-i osangbenertem dang ashi.

Mezüngbo Bassi-i Kanhaiya ama lanur ka nem tanaben maongka agüja pa nem bail agütsüba inyakyim nung police-i menokdaktsü ta metetdakja liasü, ajisüaka pai ashiba meyipa agia pai, “Ni ashiba sülen joko tensa balaka kümogo,” ta ashi.

Kanhaiya ya bail nung chiok nungbo küli aser bushisüngdang maparen nung timtem agütsüba dang masü saka ozüng alema inyaktsü akok. Iba yongji onoki pa nem bail agütsütsü nokdanger aser tarutsü nunga nokdangtsü, ta Bassi-i shisem.

Ano külen Delhi high court-i city police dang Kanhaiya Kumar-i ozüng alema benshiba osang tejangja Bodhbarnü tashi nung agüjang ta Mongulbarnü tetuyuba agütsüogo.

Mongulbar nep 10:30 ako nung Justice Pratibha Rani jakdang iba ken o angadangtsü tenzükdang, police tenüng nung nokdanger, Additional solicitor general (ASG) Tushar Mehta-i okadak, “Onoki pa nem bail agütsüba nokdanger, ta ashidang, okadaki, “Süra nenok osang tejangja kong lir ? Melira kecha jembia aotsü tenüngdaktsü mali. Nenok investigating officer dang osang tejangja tama agütsütsü shiang,” ta ashi.