Delhi Police-i Kerala House mitba sülen jangshi maneni amshitsü

New Delhi, October 27 (Agencies) : Telok kati Kerala House nung nashishi amshir ta osang sangoktsüba sülen Delhi police-i Kerala House mita ao aser iba jagi parnoki jangshi amshiba agientsüsa aküm.

Police-i mitba anema Kerala yimsüsürtemi tanü anogo piyong lungkak aitba sülen Kerala House-i tanaben jangshi amshitsü telemtetba agiogo. Iba dak sendakba nung Kerala Chief Minister Oommen Chandy-i Prime Minister dangi shidi ka züluogo.

“Kerala House staff canteen-i vegetarian aser non-vegetarian Kerala chiyungtsütem yanglua chidaktsür aser chiyungtsütemji ozüngi melabatem dang lir” ta Chandy-i PM Narendra Modi dangi züluba shidi nung shia lir.

Chandy-isa shidi nung Delhi Police-i inyakba mapa kukua aitsüba den külemi parnok ozüng tapet agi merenshitsü takhangba agütsüogo.

Hindu Sena telok kati Kerala House canteen semdang aser Malayalam oshi nung teka agi züluba menu nung ‘nashishi fry’ ta zülua aliba angu. Iba osangji parnoki police dang ashi aser Hombar nikongtsütsü Delhi police-i Kerala House mita repranga liasü.

Delhi Police-i ashiba agi parnoki law & order tenüng nung iba mapa inyak.

“Shi kar mamshitsü tenokdangba agüja lir. Onok nem osang sangoktsüba nungji tensa mejungi akümtsü amai onoki bilem” ta Delhi Police tanishir BS Bassi-i osangbener dang ashi.

Külen Kerala House canteen staff-i ashiba agi parnoki jangshi dang amshir aser parnoki ‘nashishi’ ta menu nung zülu nunga jangshi dang agütsü aser ibaji ozüngi melar.

Hombar nü Hindu nunger telok nung züngsem kar temelaba magii Kerala House telungi aitba atema ken o benokogo ta Kerala House-i osangbener dang ashi.

Tanü Kerala House kima nung Kerala nunger MP temi lungkak ait aser parnoki Kerala House canteen nung maneni nashishi amshitsüla ta takhangba agütsü.

“Iba ya Kerala nunger temeten anema inyakba mapa ka lir. Iba ya Kerala nunger aser Kerala sorkar indang kiojen lir. Police-i inyakba mapa onoki kukua aitsür” ta Kerala MP, A. Sampath-i ashi.

Iba tatalokba atema Chief Minister anatia ola adokogo aser tenaji Delhi nungi Arvind Kejriwal aser West Bengal nungi Mamata Banerjee na lir.

Tenapronglai Delhi Police-i inyakba mapa kukua aitsüogo aser iba ya loktiyimten inyakyim anema lir ta Kejriwal aser Mamata naprongi metetdaktsü.

Kerala Chief Secretary Jiji Thomson-ia sangdong ka nung Kerala House nung nashishi mamshir ta metetdaktsüogo.

“Kerala House canteen nung nashishi mamshir. Onoki jangshi dang amshir” ta Thomson-i ashi.