Delhi Police-i sorkar den rarar ama reprangteter: Kejriwal

New Delhi, August 25 (Agencies): Mongolbar nü Delhi Chief Minister Arvind Kejriwal-i Ato kilonser Narendra Modi dang, Delhi Police-i par sorkar den rarar ama reprangteter, ta ashiba den külemi pai (Modi) yarira Delhi yimti ya sentsüwangshiba yimti ka kümtsütsü, ta nangzükogo.

Kejriwal aser pa deputy Manish Sisodia nati PM Office nung Modi dang, Centre aser state na longjemer inyakba ajanga dang Delhi tajangzük angutsü aser terenlok alitsü, ta shiogo.

“Delhi Police ya Delhi sorkar den rarar ama reprangteter. Iba ya democracy atema lendong,” ta AAP tongti leniri ashi.

Kejraiwal-isa, February ita tashii aruba sülen ita asem tsüngda Delhi sorkari Anti-Corruption Branch (ACB) ajanga ozüng alema inyakbatem aika azüoktetogo, ta ashi.

Ajisüaka June 8 nü ochimashir police ketdangser ka ACB nung shim aser pai paramilitary teyari agia ACB pa kübok ayur, ta paisa ashi.

“Ato kilonseri onok den amaliteptsüla,” ta Kejriwal-i ashi.

Par sorkari Modi-i benokba ‘Swachh Bharat’ aser ‘Digital India’ campaign ya Delhi nung takok ngua inyaktsü, ta paisa shisem.