Delhi Police matsüngdang kü dak azük: Kanhaiya Kumar

New Delhi, Feb. 27 (Agencies): Jawaharlal Nehru University (JNU) kaketshir telongjem Tir, Kanhaiya Kumar-i Supreme Court-i shimba panel lawyer tem dang, February 17 nü pa Patiala House court-i anir aodang Delhi police lia lawyer temi pa dak azük, ta shiogo.
“Police-i ni court kiküm telungi anir aidang lawyer tem süoshi nung telok kati kü dak azük. Parnokji kü dak azüktsü renema liasü ama ni reprangtet aser kü dak azüktsü atema parnoki tangara ayongsem. Kü dak zükogo,” ta Kanhaiya-i ashi.
SC-i shimtetba bushisüngdangba committee nung lawyer tem den jembidang pai, “Ni miener police temi ni kümzüktsü merang saka police ketdangsertem dak-a azük,” ta ashi.
Pai SC lawyer tem den jembiba video ji tanü TV channel balala nung sayuogo.
Kanhaiya magistrate dangi anir aoba mapang pa dak azük ta Supreme Court nem metetdaktsüba sülen kasa anogo, February 17 nü panel advocates trok– Kapil Sibal, Rajeev Dhavan, Dushyant Dave, A D N Rao, Ajit Kumar Sinha aser Haren Raval nungeri Patiala House courts premises semdanga liasü.
Ano tanga tatalokba ka nungbo pai, pa dak azükdang yangji aliba police temi repranga dang toktsü, ta ashi.
Kanhaiya-i item tatalokba ajak court takdang nung obendangertem dang tatongi ashiba sülen Sibal-i DCP, Jatin Narwal dang asüngdangyaogo.
Panel züngsemtemi police ketdangser Narwal dang, “Court telungtet nung azüktsüsa (Kanhaiya dak) kechiba nai mela (?) Ner nisungtem (police) yangji liasü. Parnokji kechi repranga liasü (?) Pa telungi aitsü kechiba mela (?),” ta asüngdang.
Tasüngdangba langzüa Narwal-i, “Paji temeiner telok den aru aser court takdang anasa aliba takdang kati ait,” ta ashi.
Panel züngsemtemisa tanga police ketdangsertem danga iba tatalokba indang asüngdang.
Police ketdangsertem jagi ashiba agi, Kanhaiya dak azüksang jagi paji Kanhaiya atema okatsür lir ta ashi.
Kanhaiya-isa, pa dak azük, pa ali nung alanga yiru, iba mapang nungjibo police temji kechi inyaka laisü’ar pai memetet, ta ashi.
Iba dak sentakba nung Sibal-i DCP, Narwal dang, “Iba tetezü, police yangji liasü saka parnoki kecha meinyak,” ta ashi.
“Ni kü tesayur dang iba nisung yagi kü dak azük ta ashi, iba sülen police-i pa dang identity card sayuang ta ashi. Pai ang meyiper police dangji Identity card sayuang ta ashi. Police lia iba nisungbaji oatok aser police-i kecha meinyak. Parnoki (police) pa idangjisa aputsü koka liasü,” ta Kanhaiya-i ashi.
Panel züngsemtemi Kanhaiya dang, “Nai yangji aliba police tem aser nü dak azükba nisungji rerangtettsü asü (?)” ta asüngdangba langzüa Kanhaiya-i, “Ni parnokji reprangtettsü. Ni police dang iba nisungba yagi kü dak azük ta shiogo, ni pa anema ken o agütsüner. Kikümbang nung kü dak mezüng azüksangji pa lir,” ta ashi.
Iba mapang nungji SC panel züngsemtemi Narwal dang, “Pa kümzüka alitsüji nü khuret asütsü. Onok dang kuli tai mashitsüla. Iba tatalokba ya mangmangteter. Tangbo na B S Bassi (Delhi Police Comissioner) kübok masü saka Supreme Court tetuyuba kübok lir,” ta ashi.
“Ni mezüng court matsüngdangi anir arudangyongi ni obendanger dang, ni JNU nung PhD kaketshir ka lir aser kü dang linük ashioktsür ta ajar. Ni India Temzüng nung tamang akar ta shiogo,” ta JNU kaketshir telongjem Tir, Kanhaiya-isa lawyer tem dang ashi.
February 17 nü senior advocate temi Patiala House Court semdangba sülen Supreme Court dang, Kanhaiya takümji kümzüka mali ta metetdakja liasü.