Delhi Police trok mapa nungi anentsüogo

New Delhi, Sept 01 (Agencies): Tang ken o takatak aija alir ka police temi shishilembai anir aoba atema Agra nung aliba court ka nung ken o angadangba sülen sub-inspector ka densema Delhi police trok mapa nungi anentsüogo.

Police temji- Ashwini (Asst. Sub-inspector), Rajesh (Head Constable) aser constable Sanjay, Krishan, Yoginder aser Padam nunger lir.

Parnok ajakji Delhi Armed Police, 3rd Battalion sepaitem lir, aser parnok nem lemzüktsüba mapaji tang ken o takatak aija alirtem Delhi nung aliba tepouktak balala nungi court-i anir aotsü, Delhi adena anir aotsü aser hospital-i anir aotsü asoshi liasü, ta tanü police ketdangser kati ashi.

“Mapa nung tamakok aludaktsüba atema parnok mapa nungi khen atema anenja liasü, aser iba form ji yashi 3rd Batallion DCP-i sign süogo,” ta ketdangserisa ashi.

Police-i ashiba agi, August 27 nü aibelener Manoj Bakkarwala ji Tihar Jail nungi okatak ken o angadangtsü atema Agra-i anir aoba mapang police tem jagi pa shishilembatsü atema anir ao.

Bakkarwala miener aor police tem jagi okatak ken o angadangba sülen idangyongjisa Delhi-i anir aotsüla, ajisüaka parnoki aji oda meinyak.

Delhi-i mapusodang Bakkarwala-i pa tsüngsem alitsü asoshi mepishia liasü aser police tem jagi melunga shishilembaba tesemi pa anir ao.

Iba tatalokbaji dokan kibur kati par medemer media nung inyakertem dang ashi aser iba tatalokba noksaji CCTV nung tangoka liasü. Kasa anogo nungjisa police temji mapa nungi anenja ata.