Delhi school ana nungi kaketshir tetsür 300 hospital-i anir ao

New Delhi, May 06 (Agencies): Tanü southeast Delhi kübok Tughlakabad tesem nung aliba school ana anasa container ka nungi chemical gas ‘leak’ asüba sülen kaketshir tetsür 300 dak tema hospital-i anir ao.
Rani Jhansi School aser Government Girls Senior Secondary School nungi kaketshirtemji tenük aamba den tangu junga mesashiteti anasa aliba hospital balalai anir ao.
Iba tatalokba bushisüngdangtsü atema Delhi sorkari tuyuogo aser police-ia IPC aser Environment (Protection) Act kübok section balala nung FIR ka benokogo.
Union Minister, J P Nadda-i Centre-i ketdangsüba hospital ajak dang kaketshirtem temang anepalutsü atema renema liang ta tuyuogo, iba den külemi rongdak (emergency) atema AIIMS nungi doctor telok ka renema lir.
Police-i ashiba agi, tanep 7:35 ako meta Tughlaqabad depot nung chemical kar leak asüba osang metetdakja liasü. Container nung aliba chemical ji China nungi bener aru aser Haryana kübok Sonepat-i bener aotsü sentong lir.
Iba tatalokba sülen National Disaster Response Force (NDRF) aser police den CATS ambulance tesemji tonga ao.
Police-i ashiba agi, kaketshir 310 hospital balala nung treatment agiogo aser tang kaketshir 107 Majithia Hospital nung aser kaketshir 62 Batra Hospital nung mungdar.
Ano tanur anata tangu junga mesashiteti paediatric ICU nung yaridar.
Iba dak sendakba nung Delhi Deputy Chief Minister, Manish Sisodia-i, district magistrate aser SDM dang iba tatalokba bushisüngdangtsü pai tuyuogo, ta metetdaktsü.
“Iba school nung tatidang liasü saka iba tatalokba ajanga tatidang thinen,” ta paisa metetdaktsü.