Delhi sorkar mozü kitem nung VIP sobaliba anentsü

New Delhi, September 11 (Agencies): Delhi Chief Minister Arvind Kejriwal-i Bodbarnü Health Department dang Delhi sorkar mozü kitem nung ‘VIP sobaliba’ agientsü tetuyuba agütsüogo.
Sorkar mozü kitem nung senso ajak kasa dang anepalutsü. Linük yimtiba nung aliba sorkar mozü kitem nung VIP atema nija taktang kecha mayutsü, ta Arvind Kejriwal-isa tuyuogo.
“Ni Health Department dang sorkar mozü kitem nung VIP sobaliba anendaktsütsü tuyuogo. Senso ajak tajungtiba nung kasa anepalutsü” ta Kejriwal-i Twitter nung metetdaktsü.
Hombarnü Kejriwal-i lokti sentong ka nung jembidang Delhi nung dengue azüoktsüba nung nübortemi shilem agitsüla ta ashi.
“Yaküm Delhi nung alirtemi külemi inyakba ajanga dengue merla azüoktet. Taküm-a asenoki asen kidang merla aliba tesemtem bushitsüla” ta pai ashi.
“2015 küm AAP sorkar akümdang Delhi nung dengue agi shiranger 15,000 liasü. Tesem ajaklen nisungtem petsaprongtepa liasü aser ni tesem ka nungi kati ao. Iba küm dengue agi nisung 60 tashi asü. Ozü sorkari küm pezü tashi ketdangsüa arudang, 2018 küm dengue agi shiranger 2,700 tashi dang bendena liasü” ta Delhi Chief Minister-i metetdaktsü.
Kejriwal-i September 1 nungi campaign tenzüktsü aser pai Delhi nung alirtem dang Deobar 10 nü, anepdang 10:00 ako nungi minute 10 atema pei pei kidang merla alidak bushitsü ayongzüker.