Delhi sorkari gari senzütsü anogotem sangdongogo

New Delhi, December 06 (Agencies): Linük yimtiba Delhi nung mopung menenba nokdangtsü atema gari temzüng tasen yangluba dak sentakba nung tanü Deobar nü Delhi sorkari, Hombar, Bodhbar aser Hokolbar anogotem nung odd number (1,3,5,7,9) garitem senzütsü melatsü aser Mongolbar, Brihostibar aser Honibar anogotem nung even number (0,2,4,6,8) garitem senzütsü melatsü, ta ashi.
Delhi PWD aser Health minister Satyendra Kumar Jain-i, yimti nung mopung tamajung merüktettsü atema mera takang agitsü nüngdaker aser ‘odd-even formula’ ji minister aser ketdangsertemia benshitsü, ta ashi.
“Hopta ka nung Hombar, Bodhbar aser Hokolbar anogotem nung odd number garitem senzütsü aser Mongolbar, Brihostibar aser Honibar anogotem nung even number garitem senzütsü, aser item gari amshirji shirnok südir süaka onoki mezüngshitsü,” ta ashi.
Yashi Delhi Chief Minister, Arvind Kejriwal-i, odd-even formula ji anogo 10-15 tsüngda benokba mapang nüburtemi timtem balala ajangshira ozüng tasenba agientsü, ta shiogo.
Minister-isa, sorkari PCR Van, Fire brigade gari aser ambulance ama emergency garitem ang anogo ajak nung senzütsü melatsü, ta ashi.
“Odd-Even formula ozüng jagi minister tem aser ketdangsertema ajak alentsü. Ni-a kü gari ‘alternate’ anogotem nung ang senzütsü aser tanga anogotem nungjibo carpooling service nung dang senzütsü,” ta Jain-i ashi.
Minister-isa sorkari benokba odd-even formula dak sentakba nung tebilemba onüktem benoktsü atema nüburtemi pollutionfreedelhi@gmail.com nung shidi yoktsü akok ta sangdongogo.
Dec 4, 2015 nü Delhi sorkari benokba gari temzüng tasenba ya 2016 January mezüngnü nungi benshitsü sentong lir.
Odd-even number formula ya Asia nung Beijing yimti nungdang benoka lir aser tanabuba yimtiji Delhi asütsü.