Delhi sorkari küm ka atema moko tapu ajak ayokba nokdanger

New Delhi, April 15 (Agencies): Delhi sorkari linük yimtiba nung küm ka atema guktha, pan masala, khaini aser zarda densema moko tapu ajak ayoktsü, alitsü aser rizüngtsü nokdangba metetdaktsüogo.
Yashi Department of Food Safety-i iba atema temetetdaktsüba ka sangdongogo.
Iba ozüng nungsa taseptsü nung masepi aliba mokotema densemer.
Kasa temetetdaktsüba nung, “Gutka, pan, masala, flavoured/scented tobacco, kharra aser ibala mesükba mokotem yanglutsü, rizüngtsü, alemtsü mesüra ayoktsü memelar. Taseptsü nung aliba mesüra masepba mesüra balaka adokba, alemtsü mesüra ayoktsü küm ka atema memelar,” ta shia lir.
Health department ketdangsertemi ashiba agi, yimti nung gutkha nokdangtsü atema Supreme Court-i tetuyuba aiben agütsüba nung ajemdaker iba temetetdaktsübaji Delhi sorkari September, 2012 nü sangdonga liasü.
Ajisüaka tetuyuba nungji ‘gutkha’ dang tetshia alibayong moko alizüka ayokertemi ‘gutkha’ nung keta alibatemji (kozüjang aser moko) taseptsü balaka nung yoka liasü.
Iba yongji health department-i Delhi nung moko agi yangluba chiyungtsü ajak nokdangtsü atema temepishiba benok, ta ketdangser kati ashi.