Delhi sorkari küm ka nung aika inyaktetogo: Delhi LG

New Delhi, March 22 (Agencies): Mongolbarnü Delhi Lieutenant Governor (LG), Najeeb Jung-i, Delhi sorkar office mezüng küm teinyaktetba aika liasü, ta metetdaktsü.

Delhi assembly budget senden mezüngnü LG, Najeeb Jung-i, Aam Aadmi Party (AAP) sorkari mezüng küm shisaliok, anema-alibaren aser public transport nung jenjang dalang den külemi service tajung agütsüogo, ta ashi.

“Sorkari Delhi tesem aika nung mohalla clinics 1000 lapoktsü lemtet. Kabo Peeragarhi tesem nung tenzükogo. Delhi sorkari public hospital ajak nung mozü angati agütsür,” ta Jung-i ashi.

Yaküm Delhi Chief minister, Arvind Kejriwal aser LG, Jung na tsüngda onük aika nung mangatettep kaa arua liasü ajisüaka tanü senden nung Jung-i Kejriwal’er sorkar nem tenüngsang agüja, “Delhi sorkari taküm January ita nung odd-even policy apiteta benok aser ibaji nisung aikati junga agizükogo,” ta ashi.