Delhi sorkari shimba magistrate-i bushisüngdangba ajanga Kanhaiya maitsür

New Delhi, March 03 (Agencies): Jawarharlal Nehru University (JNU) kaketshir telongjem Tir, Kanhaiya Kumar-i JNU campus nung sentong ka alidang India anema yimyim ayim ta tai tonglokja aliba ken o Delhi sorkari shimba magisterate-i bushisüngdangba ajanga pa maitsür.

Delhi sorkari bushisüngdangba ajanga ashiba agi, JNU campus nungji linük anema yimyim ayimogo aser JNU ketdangsertemi linük anema yimyim ayimer tejak tasen kar jangjaogo.

New Delhi district magistrate Sanjay Kumar-i aniba teloki bushisüngdangba ajanga, tejak tasenpurtemji kong ali’ar bushitsüla aser parnoki agiba shilemji bushisüngdangtsüla, ta ashi.

Kasa osang ajanga, Kumar anema kuli mangur iba den külemi pa nem tai tonglokja alibaji nungittsü atema kulitem mesüra video mali, ta ashi.

Yashi Delhi High Court-i Kanhaiya Kumar nem bail bond sen 10,000 nung interim bail ita trok agütsüogo, aser pa tepoukdak nungi Brihostibar aonung chiokogo.

Magistrate osang ajangasa, JNU kaketshir, Umar Khalid bo video aika nung angur aser pai Kashmir den Afzal Guru pusembaji temetet dang, ta ashi.

Iba sentongji Umar Khalid-i ayongzük, anungji pai agiba shilemji maneni bushisüngdangtsüla, ta kasa bushisüngdangba osang ajanga ashi.

Umar den JNU kaketshirsa, Anirban Bhattacharya na anogo 10 shi atsüka aliba sülen February 24 aonung police matsüngdangi aoba sülen tenaprong apu.

Police-isa JNU Kaketshir ka tenüng agi Ashutosh Kumar danga asüngdangyaogo.

You must be logged in to post a comment Login