Delhi yimti nung ano Odd-even scheme tenzüktsüa akok

New Delhi, October 26 (Agencies): Asükwa atongtsü lia Delhi aser NCR nung anogoshia mopung temenenba kümdar, aser iba dak sendakba nung Delhi sorkari, gari lenmang nung gari ajema senzütsü atema odd-even vehicle rationing scheme ano tenzüktsüa akok, ta metetdaktsü.
Bodhbarnü Delhi Transport Minister Kailash Gahlot-i shidi ka ajanga Delhi Transport Corporation (DTC) dang odd-even scheme tenzüktsü atema renema liang ta tuyuogo.
Iba ozüng kübok anogoshia anepdang 8:00 ako nungi aonung 8:00 ako tashi odd registration number (1,3,5,7,9) aliba nija garitem anogo ka nung, aser even numbers (0,2,4,6,8) aliba garitem anogo ka nung ka melentepa senzütsü melatsü.
Ajisüaka Honibar, Deobar aser public holidays nungbo iba scheme mebenoktsü. Ano vehicle rationing scheme benoker mezüngbuba round ana nung CNG aser electric garitem, two-wheelers, tetsürtemi aniba garitem iba ozüng küboki maittsü. Ano medical emergency garitem, matamabensartem mena aliba garitem, kanga tongtibang nisungtem aser sepai garitembo anogo ajak nung senzüdaktsütsü.
Shidi nungji yamai shia lir, “Delhi nung mopung menenba level kanga tali kümdar, aser ibaji ajanga sorkari odd-even scheme densema mera kar agitsüsa akumer.”
Iba scheme ya mezüng yaküm January 1 nü benoka liasü. Iba sülen tanabubarenji yaküm April 15 nü tenzüka liasü, aser iba mapang nung ozüng alema aibelenertem dang senchi 2000 chia aruogo.