Delhi:Naga tsür ka tashiyim agi raksatsüsang puogo

New Delhi, February 21 (Agencies) : South Delhi nung mapang intoka kazüba nüngtugu tesem ka nung Naga tsür ka tashiyim agi raksatsüsang puogo, ta Mongulbarnü Police-i metetdaktsü.
Deputy Commissioner of Police Ishwar Singh-i iba sangji mezüng tenüng Jhandal agi metet. Iba tebur ya arishi küm 23 tain lir.
Hauz Khas village nung aliba pub aser restaurant tem nung part time merük meju mapa inyaksang ya CCTV nung aliba video ajanga jangjatet.
Ishwar Singh-i, iba nisung ya pa aliba slum nung oa Mongulbar anepdang apu, ta ashi.
Police dangi phone mesüdaktsütsü asoshi Jhandal-i iba tetsür indang iPhone tama rakzüka ayu aser la den tashiyim agi shi nung medemba sülen sen 600 dena auyar ao. Phone jibo meyipa nguogo.
Ni yi jemer liasü aser ni gari lenmang nungji la den lar medemtsür ka tena auto ataa angu, ta Jhandal-i police dang ashi.
Police-i ashiba agi, arishi küm 24 tain tetsürji Honibar aonung Hauz Khas pub ka nung lar medemer den mapang intoka liasü.
La kija kidangi jaja yonga oyaa lia, tang pua alisangi la kidangi meinoktsütsü asüngdang, ta police-isa ashi.
Pai laji shinga maliba tesem kati anir ao aser anaben tashi tashiyim agi shi nung medem. Police nem osang agütsü nungbo la tepsettsü ta pai la amokmeren.
Tetsür la jagi la jena mao tsüngda tebursang dakji long ka agi tekolak nung ako aser iba sülen lai police patrolling jaja aliba telok dang iba tatalokba ashi.