Delimitation Asütsüla

India kübok state aser union territories nung lemsaa aliba constituency tem reprangshimtsü nüngdaker ta ajiteta Parliament nung 2002 küm Delimitation Act yanglua state pungu dak alaka tanüngba state ajak nung lemsashitsü nüngdak ta asüba Assembly aser Lok Sabha constituency tem reprangshima liasü. Iba delimitation maparen nung Nagaland madentsüsa tensa ka ajuru aser yamaji iba mapa meinyaki küm aika süia arur, tawa Centre sorkari taoba mapang madenertem atema Delimitation Commission ka tentetogo aser iba ya asenok atema osang tajung ka lir. Centre-i tan shimba Delimitation Commission ya Jammu & Kashmir Union Territory aser state pungu-Assam, Arunachal Pradesh, Manipur aser Nagaland atema lir. Nagaland nung assembly constituency reprangshima lemsashiba maparenji küm 40 shi tejaklen inyakba liasü aser iba mapang jibo constituency ya timi lemsa asütsü akok. Saka kümtem süia arudang asenok nütsüng teimba renloker aser külen constituency ka nung alirtemi iba constituency ji toktsür tanga constituency ka nung ang oa alitsüsa mapangtem ajurua aser ano yimtsüng/kiyong tasentem kümteta aoba ajanga constituency aika kanga dang meputep küma lir. Yimya agi state ka nung assembly constituency temji kasasa lemsatsüla aser yamaji voter tem yongsük kanga tepila malitsüla. Ajisüaka, tanü Nagaland nung constituency tem reprangdangra, kar nung voters meyirjang 30-40 tashi lir saka kar nungbo meyirjang 10-a majung aliba angur. Iba yabo kangasa meputep aser reprangshimtsü nüngdaka lir. Constituency tulu aser tila ta bendangba nungji tebilemtsü tulu keta lir aser teti constituency tulu nung alirtemi takoksa tuluba angur. Ano, Nagaland nung tang lemsaa aliba constituency tem ya jungjunga reprangdangra, yimtsüng mesüra colony/ward karbo tanga constituency ka nung ang adentsüba sernung, tang aliba constituency nungji kanga dang meputepi dendakja aliba angutsü. Item amala yimtsüng mesüra colony/ward ji kasa constituency nung alirtem den medemdangra, terenlok maliba aser tejakleni maoba angutsü. Anungji, Nagaland ya India kübok state ka amasa ali tashibo, delimitation asütsübaji kanga dang nüngdaker kechiyong constituency aika lemsashi nung dang tesem ajak kasa terenlok alitsü. Naga nunger aikati delimitation ta asüba ya mapa tamajung ka mesüra khuret ka ama bilemer, saka iba ya nübor ajak sorkar nungi terenlok aser tajangzük kasasa angutsü atema inyakba mapa ka lir. Shitakba agibo iba mapa ya küm 10 shia reprangdanger inyaktsüba mapa ka saka Centre-ia ibaji meinyakteti arur. Naga nungeri angatettsübaji delimitation maparen atema political party temi masü saka public-i ang ola adoktsüla. Political party temi iba dak sendakba nung parnok tebilembatembo lemsateptsü akok saka inyaktsüla mesüra meinyaktsüla ta Centre rongshitsü nüngdak madoker. Iba mapaji constituency shia nung nübortem indang tebilemtsü aser teinyaktsü lir. Constituency reprangshima lemsashitsüba atema olaji public-i aser talisa yimtsüng aser colony/ward lennirtemi adoktsüla. Yimten yimsüsürtem aser colony/ward ketdangsertemi nür constituency nung alirtem den iba onük jungjunga angatettepa jembitsüla aser nür constituency lemsashitsüla ta ajitetra, iba tebilembaji Delimitation Commission dangi tezüluba nung tim tagütsütsüpur ajanga abentsüla.Nagaland nung constituency tem reprangshima lemsashitsübaji kanga dang rongdak nüngdak ka lir anungji tekaratiba nung tan-a iba mapa nung mopung tamajung maidang, takoksa ajuruba constituency tem nung alirtemi delimitation maparen pusema ola adoktsüla, aser timi inyaktsü atema ajungshitepa yariteptsüla.