Delimitation sülen Kashmir nung election agitsü: PM Modi

June 24, 2021 nü New Delhi nung Ato kilonser, Narendra Modi leniba nung Jammu & Kashmir nung yimtenren party balala nungi lenirtem den senden amenba sülen tangokba noksa nung angur.

New Delhi, Aami/June 24 (Agencies): Brihostibarnü New Delhi nung Ato kilonser, Narendra Modi-i Jammu & Kashmir nung yimtenrren party balala nungi lenirtem den ghonda asem shi senden menogo; 2019 küm Jammu & Kashmir nung Arrla 370 agienba sülenbo tang mezüng pai J&K nungi lenirtem den senden amener.

J&K nungi lenirtemi ashiba agi, Ato kilonser Modi-i Jammu & Kashmir nem state jenjang agütsütsü aser yimtenren inyakyim tenzüktsü, ta shiogo.

Centre sorkari Jammu & Kashmir nungi party tem dang, tang Centre yimsüsüba kübok Jammu & Kashmir nung terenlok kanga kaogo, aser item rongnung tang mezüng block-level elections agiba densema lir, ta metetdaktsü.

Senden tembangba sülen osangbenertem den jembidang Jammu & Kashmir People’s Conference nungi lenir, Muzaffar Hussain Baig-i, “Ato kilonser, Modi leniba nung amenba senden nung adenertem ajaki Jammu & Kashmir nem tanaben state jenjang agüjang ta takhangba agüja liasü,” ta metetdaktsü.

“Senden nung J&K lenirtemi benokba onük ajakji Ato kilonser Modi-i kanga nendak-nendaka angaba sülen pai telangzüba agütsü,” ta Muzzafar Hussain Baig-isa ashi.

Tarutsü nung J&K nung assembly elections ayongzüka agitsü atema mapang memetetdaktsü, ajisüaka delimitation maparen tembangba sülen Kashmir nung election agitsü atema inyakyim tenzüktsü ta Ato kilonseri shiogo, ta paisa shisem.

Arrla 370 dak sendakba nung pai, “Iba onük ya Supreme Court nung benoka lir, anungji iba atemaji o lemteptsü menüngdak,” ta ashi.

National Conference lenir aser taoba mapang Jammu & Kashmir Chief Minister, Farooq Abdullah-i, “Jammu & Kashmir atema tamang katettsüji kanga nüngdak. New Delhi tsütsülen nungi tamang katettsü atema mezüngbuba meraji Jammu & Kashmir nem state jenjang agütsütsüla,” ta metetdaktsü.

2019 küm August ita tetenzüklen Jammu & Kashmir nung Arrla 370 agiena union territories ana kümtsüba sülen tang mezüng Centre aser Jammu & Kashmir nung yimtenren lenirtem tsüngda senden menogo.