DeMo sülen Gujurat nung sen crore 3,118 ayu

New Delhi, Aami (June) 22 (Agencies): 2016 küm demonetisation asüba sülen anogo pungu tsüngda Bharatiya Janata Party (BJP) den sendaktepa aliba Gujarat district cooperative bank 11 nung sen crore 3,118.51 ayu ta tanü Congress-i metetdaktsü.
“India nüjiso anguba sülen ochimashi mapa tulutiba inyakbaji iba ya liasü” ta Congress otongdar Randeep Surjewala-i RTI telangzüba ka nung ajemdaker ashi.
Activist Manoranjan S Roy ajanga RTI telangzüba ka anguba nung iba ya shia lir. RTI telangzübaji NABARD nung chief general manager aser appellate authority ajanga agütsüba lir.
Tanga district co-op bank tem rongnung Ahmedabad District Cooperative Bank (ADCB) nung sen teimba ayu.
Prime Minister Narendra Modi-i November 8, 2016 nü osang sangdongba sülen anogo pungu tsüngda iba bank nung sen crore 745.59 tashi benok.
Iba bank nung BJP tir Amit Shah-i 2000 küm chairman inyak aser pa tanü tashi director lir.
Bank tem nung sen ayubaji bank telatetbatem kübok liasü aser KYC norms ajak inyak. 2016 küm November 10 nungi 14 tsüngda sen ayuba nung taitsü aketba inyakyim kecha maliasü, ta NABARD-i tanü ashi.
ADCB sülen Rajkot District Cooperative Bank nung sen crore 693.19 ayu. Iba bank nung chairman ji Jayeshbhai Vitthalbhai Radadiya lir aser pa ya Gujarat nung cabinet minister ka lir.
Tanü Congress-i ashiba agi, “RTI telangzüba ajanga demonetisation ya BJP nung teshimtet telok ka ajangzüktsü atema inyakba liasü ta sayur.”