Democracy ainba ajanga Africa nung terenlok alitsü: Obama

Addis Ababa, July 28 (Agencies): Africa nung tentetba linüktemi democracy yimsüsütsü yimya indaktsütsü asoshi bendanga agüja inyaba ajanga parnoki terenlok anugtsü ta US Tir, Barack Obama-i tanü Mongolbar nü metetdaktsüogo.
Linük 54-i tentetba African Union (AU) senden nung shilem agir mezüngbuba US Tir küma, Obama-i tanü iba olenji metetdaktsü.
Paisa ashiba agi, linük temzüngi memelakasa, Burundi lenisangi Tir menden tasembenren abentsü asoshi maparen inyakba ajanga lendong bener arutsübaji par linüki democracy inyakyim anema inyaktsü tenzükba kuli sayur lir.
“Africa-i tejakleni mera agitsü tenzükogo aser tanübo Africa kübok densemba linük aika nung tongpang rarabaren aser makamaitba jenjang tamajungji terenlok anguba agi melenzüktsü tenzükogo,” ta pai ashi.
“Ajisüaka, Africa nung nütsüng yongsük billion 1 shi ya taruba küm 10 tsüngda nung anasü agi timba akümtsü,” ta shia, Africa-i mapa inyaktsü lenmang jenti lapoktsü nungdakba olen ka pai metetdaktsü.
“Africa nung terenlok angutsüji democracy junga benshiba dak akettsü,” ta shia, osangbenertem tepuokdak puoka ayuba aser ozüngi agizükba yimtenren teloktem ajemrepa ayubaji democracy anema inyaker lir ta ajaki angatettsüla ta pai ashi.
Obama-i tebu tasoli, Kenya semdangba sülen tan AU tesepti, Ethiopia semdanger lir.