Democracy ajanga Khristan state kümtet: Tokheho

Dimapur, October 20 (TYO): Democracy ajanga Hindu nunger teimba sür aliba linük ka nung Khristan state ka kümteta lir ta Tokheho Yepthomi-i ashi.
October 20, 2017 nü ATI Imagine Hall, Kohima nung State Level Parliamentary Quiz and Youth Parliament Competition nung tongti tesemdanger o jembidang Tokheho-i iba olen ashi.
School Education & Parliamentary Affairs Minister, Tokheho Yepthomi-isa, ‘omen- ‘Youth in Strengthening Democracy’ ji tanü linük den kanga putepa lir kechiyong lanur nütsüng yongsük aika lir. Iba sentong ya democracy nung shilem tongti ka lir” ta ashi.
“Iba sentong ajanga pei bilembatem jembitsü aser tangar nem-a jembidaktsütsü tangatetba agütsür. Talisa democracy ajanga Hindu nunger teimba sür aliba linük ka nung Khristan state ka kümteta lir. Kaketshirtemi iba sabang ya democracy angatetba aser agizükba sabang ka südakjang” ta paisa ayongzük.
Sentong nung Department of Parliamentary Affairs Secretary, A. Chumremo Odyuo-i 1965 küm nungi agiyonga aruba sentong indang osang metetdaktsü.
Tetoktepba nung district 10 nungi kaketshirtemi telemsa ana Youth Parliament Competition aser Parliamentary Quiz nung shilem agi.
Youth Parliament Competition nung Kohima District nungi Mezieneino Nakhro-i mezüngbuba, Dimapur nungi Sungjemlila Longkumer aser Kiphire nungi Yangthingba nati tanabuba aser tasembuba jenjangtem angu.
Parliamentary Quiz competition 2017 nung Peren nungi Mercy Rengma aser T. Thinglila nati mezüngbuba jenjang takok angu. Tanabuba jenjang nung Dimapur nungi Rokosetso Thou, Rolan aser K. Kaluto Chishi nungertem aser tasembuba jenjang Mokokchung nungi Athekhingla C. Sangtam, Jabel Kinimi aser Sentiwapang Imchen nungertemi takok ngua liasü.
Sentong nung mendenji Kohima College Assistant Professor, Dr. Eunice Alinger liasü aser Parliamentary Affairs Deputy Secretary, Tsuktimar Jamir-i anküp tepela o jembi.