Democratic Progressive Party lokti senden amen

Dimapur, July 26 (TYO): July 26, 2017 nü Nousi Auditorium, Niathu Resort, Chumukedima nung Democratic Progressive Party (DPP) pur lokti senden ayongzüka amen.
Sentong nung Mendenbuba Nuzota Swuro, Vice President, DPP-i okila jembi aser Infant Jesus Church Catechist, Orenthung Yanthan-i temoatsü meshia sarasadem, ta DPP Media and Communication Cell-i sangdong ka nung metetdaktsü.
DPP General Secretary, Pausui Zeliang-i tesentepertem pela agizük aser DPP President, Chingwang Konyak-i tir o jembidang, “tang Nagaland state yimten tensa reprangdangra, DPP ya kanga nüngdakba telok ka lir, anungji züngsem ajaki akangakanga nokdaktsüla aser longjemer alizüng tonga inyaktsü atema merangtsüla” ta ayongzük.
Sentong nung Alemtemshi Jamir-ia o jembidang, Nagaland nung yimten telok tanga kaji DPP ya lir aser DPP ya nübortemi, nübortem asoshi aser nübortem ajanga inyakba telok asütsü, ta ashi.
Nagaland nung taruba sorkarji DPP-i akümtsübaji temetet dang, saka party-i sorkar akümbaji yutsür, nübortem tenzüktsü atema bilema inyaktsüla, ta Alemtemshi-isa ashi.
DPP Secretary General, Abu Metha-ia o jembidang, nübortemi aginüba atema DPP tentet, ta ashi.
DPP tentetba sülen nübortemi iba telok kanga pelashishia agizükogo aser onoki nübortem taginüba aser ola tashi anga inyaktsü, ta Abu Metha-isa metetdaktsü.
Sentong nung DPP Vice President, Kakheho Sukhalu-i anküp tepela o jembi.
DPP senden nung bangzüng renembatem:
Taoba India Tir-i kümsük takok ngua inyakba aser Tir tasenbai mapa benzükba atema Democratic Progressive Party (DPP)-i taoba Tir Pranab Mukherjee aser Tir tasenba Ram Nath Kovind naprong nem tenüngsang agütsür aser moatsür, ta tanü senden nung adenertemi lemtet.
DPP-i tang teinyakdak yimjung olemtep pusema nungiter aser Indo-Naga yimten tebilemtsü nung adenba teloktem aser talisa India sorkar dang, ajaki agizüktettsüsa telemtetba ka tekaratiba nung agitsü atema mepishitsü lemtet.
Naga yimten teloktemi Naga nungeri ola adokba tashi angaa, külemi longjemtsüla, ta DPP-isa bangzüng ka renem.
NSCN (K) nung Tir inyaktsü atema Khango Konyak shimba pelashishia agizüker aser pa nem tenüngsang agütsür. India aser NSCN (K) tsüngda ceasefire agienba sülen, meta talang pilar aliba district tem nung aser international boundary anasa alirtem timtem kanga ajurur, anungji India sorkar aser NSCN (K) nati nübortem ola angashia, ceasefire tenangzüktep agitsü mepishitsü DPP-isa lemtet.
Arogo aser civil society nati clean election campaign tenzükba DPP-i pelaa agizüker aser party-ia iba mapa pusema nungiter aser clean election movement takok ngudaktsütsü atema shilem tajung agitsü, ta DPP-isa lemtet.
Pillai’er kiojentem mita aoba sülen Nagaland police department nung ochimashi ken o tulu yimjak nung metetdaktsüba atema DPP-i kanga süoki ia bilemer. Küm aika police department nung tim masüba inyakyim aser ochimashi inyaka aruogo aser Nagaland nung department aika nung ochimashi inyakbaji ajaki meteta lir. Iba ochimashi inyakyim anema raratsü aser agientsüba asoshi mapang tongogo.
Anungji, Pillai-i inyakba mapa ajak bushisüngdang asütsü akhanger aser public sen auyazüka agirtem ajak ozüng tapet agi merenshitsü aser sorkar sen auyazükba ajak sorkar senpongi aitdaktsütsü atema mapa inyakang ta DPP-i takhangba agütsütsü lemtet.
Iba onük atema bushisüngdang tajung ka masü tashi, nübortemi temulung malemtsü aser Pillai mapa nungi anentsüba jagidangbo meperir, ta DPP Media and Communication Cell sangdong nungsa metetdaktsü.