Demonetisation ajanga Jan-March nung GDP shilem 5.7 tashi alutsü

New Delhi, January 25 (Agencies): ‘Demonetisation’ ajanga India nunger GDP ainba ajema küma yaküm October-December nung GDP ainba shilem 6 tashi ajema alua liasü aser taküm January-March nung shilem 5.7 tashi ajema akumtsüa akok, ta Nomura report ajanga metetdaktsü.
Japanese financial services major, Nomura-i ashiba agi, demonesitation masüdang kanga tekaraba ainba sector anaji consumption aser services liasü, aser itemji tamajungba kongshiogo.
Ajisüaka 2017 küm tom sülenbo jenjang ajungtsü imlar, ta parnokisa ashi.
“Yaküm July-September nung GDP ainba shilem 7.3 nungi October-December nungbo shilem 6.0 tashi ajema alutsü aser January-March 2017 nung shilem 5.7 tashi ajema alutsü ta onoki imlar,” ta Nomura-i research agiba osang ka ajanga ashi.
Tamalen November ita nung Nomura-i osang ka ajanga, 2016 tesüsabuba ita pezü nung India nunger GDP ainba shilem 6.5 tashi ajema alutsü aser 2017 küm mezüngbuba ita pezü nung shilem 7.5 tashi akumtsü ta metetdakja liasü. Ajisüaka Centre sorkari sen 500 aser 1,000 notes anenja liasü.
Yaküm November 8 nü Ato kilonser, Narendra Modi-i ochimashi aser black money anema demonetisation sangdonga liasü.
Demonesitaion mera agiba ajanga shitakba agibo Central Bank, RBI-i interest rate ajemtsüla, saka December 7 nü parnoki interest rate nung temelenshi kecha mebenok.
Central Bank-i maneni February 8 nü monetary policy senden amentsü.