Demonetisation ajanga terenlok mapa anenogo: Meghalaya CM

Tura, February 20 (Agencies): Yaküm November ita nung Ato kilonser, Narendra Modi-i ochimashi sen anema sen 1000 aser 500 notes anentsüba sülen ita asem süiaka linük nung National Party tongti ana- Congress aser BJP na aitsütepba manener, aser tanüa Meghalaya chief minister, Mukul Sangma-i, demonitisation ajanga terenlok mapa anenogo, ta aitsü.
Tanü North Garo Hills kübok Resubelpara jila nung Congress party senden amendang, demonetization ya nüburtem anemba mapatong ka lir, ta bangjem.
Tanü Meghalaya Pradesh Congress Committee – Jan Vedna Sammelan nung All India Congress Committee (AICC) Meghalaya Incharge, CP Joshi, forest & environment minister, Clement Marak, elementary education minister Deborah Marak, sports minister Zenith Sangma aser taoba mapang state chief minister ana- DD Lapang aser Salseng C. Marak nungera dena liasü.
Demonetization aija chief minister, Sangma-i, terenlok mapa anenogo, kechiyong tang tashi nüburtem bank aser ATMs nung tarensena nokdaka angur, ta ashi.
“Modi-i India ya shidi sen mamshiba linük ka kümdaktsüner, ajisüaka pai tongtibang lenir ajak den lemtepa iba telemtetba agi asü? Pai aonung ka yongi dang iba telemtetba agiba ajanga sensakertem, aluyimertem, aayangertem, dokan shishirtem aser unrecognized sector ajak timtemdaktsür,” ta Mukul-i ashi.
Meghalaya CM-isa, “Northeast state tem nung aliba nübur aikati kiyimba benjung aser mangyimer nem sen aguja yariteper. India ya sen mamshiba linük ka kümdaktsüra, asenoki maneni iba sobaliba inyakyim koma benshitsü?” ta asüngdang.
State AICC in-charge, CP Joshi-ia, demonitisation ajanga Central bank tashi makai kümogo, ta aitsü.
Demonisitisation telemtetba sülen anogo 50 nü tensa süngjemtsü ta Modi-i nangzükba aija Joshi-i, “Joko ita asem abensar, aser Modi-i nüburtem dang black money kwi putet’ar metetdaktsütsüla,” ta ashi.
Modi-i linük nüburtem dang ‘tajung anogotem’ nangzük, saka itemji kong ali? ta paisa asüngdang.
Joshi-i, demonetization ajanga nisung kar dang tajangzük angu, saka nisung timbakati timtem ajuruogo, ta ashi.
Iba senden nung Congress-i, nüburtem saaksalemdaktsütsü aser Modi den par party-i nüburtem anema mapatong benokbatem magizüktsü atema sangdongtsü bangjem.
Northeast nung aliba state ajak nung BJP-i parnok amenoktsü merangba mapang ka nung, aser state nung assembly election agitsü joko küm ka shi dang lia Congress jenjang mejungi kümdar, ibayongji parnoki asüngsashir nüburtem anidentsü meranger.