Demonetisation anema Cong-i longkak ait

Shillong, Jan. 18 (Agencies): Bodhbarnü Meghalaya nung Congress MLA-i anir parnok telok pusemertemi Reserve Bank of India (RBI) office kima demonetisation anema longkak aita liasü.
BJP aser Congress naprong küsa ochimashi lir ta aija, Civil Society Women’s Organisation aser Thma U Rangli teloki RBI office kima Congress teloki longkak aitba anema parnok teloka longkak ait.
Taoba mapang Assam Congress nungi Minister Rockybul Hussain aser taoba Arunachal Pradesh MP Takam Sanjoy-i anir iba longkak aitba nung shilem agi. Meghalaya minister Mazel Ampareen Lyngdoh, Ronnie V. Lyngdoh, Sniawbhalang Dhar aser Congress lenir aika iba sentong nung aden.
“Congress aser BJP na küsa auer lir. Telok anaprong ochimashi ya sen ka nung temeyiptep aliba ama lir,” ta RBI kima Congress telok longkak aitertemi Modi anema yimyim ayimba mapang CSWO Tir, Agnes Kharshiing-i ashi.
Parnokia demonetisation anema noktaker kechiyong iba ajanga tajemzük tia nung aliba nüburtem kanga timtemdaktsür, aser Congress teloki Meghalaya nüburtem kanga teimtemdaktsür, ta telok ana leniri ashi.
“2014 küm Meghalaya assembly nung Lokayukta tenzüktsü asoshi Act ka renema ayu saka Congress sorkari iba committee meshimtet, aser iba mesüka BJP-i aniba sorkari Lokpal mapa küma meinyak. Parnok ajak ochimashi aliba ajanga parnoki ochimashi anema meraraba sayur,” ta Thma U Rangli lenir, Angela Rangad-i ashi.
Congress lenirtemi iba atema kicha telangzüba magütsü, saka tajemzük tia nung aliba nüburtemi shir telok ochimashi, aji meteta lir, ta ashi.