Demonetisation aser GST-i rongsen ketsüng raksatsü: Gandhi

Mongulbarnü Rajasthan kübok Maniya tesem nung Congress Tir Rahul Gandhi-i party züngsemtem den ajurutepdang agiba noksa angur. (Dholpur, October 9) 

New Delhi, Mongputeni/October 9 (Agencies): Sangtennü Ato Kilonser anema taküm election agitsü aliba state; Rajasthan nung jembidang Congress tir Rahul Gandhi-i ashiba agi, demonetisation aser Goods and Services Tax, koba dang ‘Gabbar Singh Tax’ ta ajar, iba ajanga India rongsen ketsüng raksatsüogo.
Dholpur, Mania tesem nung rally ka nung jembiba mapang Ghandi-i, Ato Kilonser Narendra Modi-i election mapang pa ‘chowkidar’ ka kümner ta ashi saka shiba anüktsübar ajibo mashi, ta ashi. Congress tir-isa ashiba agi, pai linük nung aluyimer melena industrialists 15 nungi 20 tsüngda ajangzükdaktsüogo.
Gandhi-i, taoba UPA sorkar mapang par party-i anir aluyimertem loan sen crore 70,000 alang magi. Ajisüaka tang aliba sorkari sentsü sen crore 3.5 lakh crore alang matok aser Ato Kilonseri aluyimertem sen kati dang teyari magütsü, ta ashi. Congress tir shiba tang Rajasthan anogo ana semdangtsü asoshi oa lir, pai industrialists tem rongnug Nirav Modi, Mehul Choksi, Lalit Modi aser Anil Ambani nung tetshia ashiba agi PM Modi-i aluyimer aser lanurtem anepalu masü saka parnok ajangzükdaktsüogo.
Maneni Gandhi-i, demonetisation aser GST benoktsü asoshi sorkari telemtetba agiba ajanga linük rongsen ketsüng raksatsüogo, ta ashi. Congress tir-isa, Centre aser state sorkari small scale business, aluyimer, tetsür aser lanurtem anema inyakogo, ta ashi. Taoba UPA sorkari MGNREGA densema schemes aser sentong balala sensakertem atema benoka inyakogo. Maneni taoba Ashok Gehlot sorkari Rajasthan nung angati medicines schemes bener aru saka BJP sorkari item ya tashimeiti kümdakja nüburtem anema inyakogo, ta Gandhi-i ashi.
Congress tekolakbai Rasemnü Bikaner semdangtsü. Rajasthan nung election Luchii/December 7 nü agitsü.