Demonetisation: December 30 sülen Nitish-i telemtetba agitsü

Patna, December 22 (Agencies): Sen tamshidak anentsür anogo 50 abensaba sülen JD-U Tir aser Bihar Chief Minister, Nitish Kumar-i telemtetba ka agitsü, ta Brihostibarnü party lenir kati metetdaktsü.
Centre-i sen tamshidak anentsüba ya Nitish-i pusema liasü saka anogo 50 abensaba sülen pai ibaji maneni pusemtsü asü anema nokdaktsü’ar telemtetba agitsü.
“Ato kilonser Narendra Modi-i sen tamshidak anentsüba dak sentakba nung party-i lenirtem aser party nung inyakkertem dang nungi osang agidar,” ta state JD-U Tir, Vashisht Narain Singh-i Patna nung osangbenertem dang ashi.
“Ato kilonseri nüburtem dang anogo 50 sülenbo tensa süngjemtsü ta shiogo, anungji anogo 50 abensaba sülen iba onük nung Nitish Kumar-i tatembang telemtetba ka agitsü,” ta Singh-i ashi.
Taoba Hombarnü Nitish Kumar-i, sen mamshiba linük ka akumtsüji India nung tamakoktsü, ta jembia liasü.
“Tang tendak, sen mamshiba linük ka akumtsüji tamakoktsü. Terenlok nung ajemdaker sen amshiba transactions ji tanem-tanemi ajema akumtsü,” ta Nitish Kumar-i ashi.
Paisa, “US ama terenlok aliba linük ka nunga sen mamshiba rongsenkettsüngji shilem 40 nungi 45 tashi dang lir,” ta ashi.
Nitish Kumar-i, “Black money anentsü atema sen tamshidak anentsüba kijaji teperi masü. Centre sorkari kibur tenüng maliba kiojentem anema-a inyaktsüla,” ta ashi.
Anogo ana tejaklen Rashtriya Janata Dal (RJD) tongti, Lalu Prasad-i, “Nitish Kumar-i kü dang, anogo 50 sülen demonetisatiion agi kongshibaji reprangshitsü aser iba nungji ajemdaker Centre sorkar dang langzütsü ta shiogo,” ta metetdakja liasü.
Nitish Kumar-i iba onük nung Centre pusema aruba ajanga state nung par teloktep- RJD o Congress na mepelar.