Demonetisation-i takartem dak dang kongshi: Biren Singh

Imphal, November 9 (Agencies): Yaküm Centre sorkari demonetisation mapa inyaker küm ka ajungba anogo nung Imphal kübok tesem balala nung sentongtem ayongzüka agi, kar demonetisation pusema aser kar demonetisation anema liasü.
“Demonetisation ya Prime Minister Narendra Modi-i kanga dang tasü itta inyakba mapa ka lir aser iba ya ajanga takartem dak ang kongshi. Saru memenokertem ang kongshi” ta Chief minister N Biren Singh-i sentong ka nung jembidang ashi.
Külen Manipur nung opposition lennir Okram Ibobi Singh-ibo “iba inyakyim ajanga linük rongsenkettsüng jenjang tamajungba kümdaktsü aser nübortem timtemdaktsür” ta ashi.
Imphal Valley nung BJP züngsemtemi ozüng alema sen bendenba anema sentongtem ayongzüka agi aser ‘Anti-Black Money Day’ nung Biren-isa ashiba agi, “demonetisation aser Goods and Service Tax (GST) ajanga nisung aika ajangzükdaktsüogo.”
“Ozüng alema sen bendenba, taila sen amshiba, kiralongrartem yariba, ozüng alema mozü aser prangpong-injang shibelenba agientsü atema demonetisation ya tongti süa inyakba lir. Rongsenkettsüng mapa nung tashishitsü melii inyaktsü atema cashless transactions, digital wallets aser credit cards amshitsü ajungmesotsü atema iba mapa ya tenzük” ta paisa shisem.
“GST tenzükba sülen sorkari saru teimba ngutetogo aser July nungi September tsüngda state sorkari sen crore 184.31 sarutetogo” ta Biren-isa metetdaktsü.
Külen, opposition lennir aser Congress tanishir Okram Ibobi Singh-i demonetisation aitsü aser iba ya ajanga nübortem nem khuret aika bentsür aruogo ta ashi.
“NDA sorkari foreign bank tem nungi ozüng alema bendenba sen bener aruba sülen linük nung senso shia nem sen lakh 15 agütsütsü ta nangzük. Iba senji kong lir aser Centre nungi nisung kwikati iba sen ngua lir?” ta Ibobi-isa asüngdang.
“Demonetisation ajanga linük nung nisung million pungu shi mapa mali kümogo aser linük indang GDP ajemogo” ta paisa shisem.