Demonetisation maparen tatembangleni arur: Arun Jaitley

New Delhi/London, February 25 (Agencies): Union Finance Minister, Arun Jaitley-i, demonetisation inyakyim tatembanglen kati arudar, aser iba ya alima nung sen ‘high denomination’ melenba inyakyim tajungtiba liasü, ta metetdaktsü.
Yashi London nung London School of Economics nung azünger kaketshirtem aser tesayurtem den jembidang Jaitley-i, India jenjang tajungba ka akumtsü atema sorkari sen 500 aser 1,000 anentsütsü atema telemtetba agi, aser iba ya ajanga linük rongsenkettsüng aintsü, ta metetdaktsü.
“Demonetisation inyakyim tatembanglen kati arudar, aser iba ya alima nung sen melenba inyakyim tajungtiba liasü,” ta Finance & Corporate Affairs Union Minister, Arun Jaitly-i metetdaktsü.
“Demonetisation ya India jenjang tajungba akumtsü atema lemtet. Shidi sen amshiba rongsenkettsüng ka tangbo digital agi melentsü, koba ajanga sen aika banking küboki aittsü aser saru timba angutsü,” ta paisa metetdaktsü.
“Demonetisation sülen iba ya ajanga tarutsü nung GDP taliba aintsü,” ta pai ashi.
‘Transforming India: Vision for the Next Decade’ onük nung jembidang Minister-i, India putiotsü jenjang ka nung nokdaka lir. Alima rongsenkettsüng ajanga tayongzükba aika maneni ajurur. Alima nung rongsenkettsüng mezünglongi inra ibaji ajanga onoka (India) kongshir,” ta paisa shisem.