Demonetisation nung ochimashi ajak jungkai adoktsütsü: Rahul Gandhi

New Delhi, December 09 (Agencies): Tanü Congress tatong Tir, Rahul Gandhi-i, Parliament nung Demonetisation onük jembitsü atema sorkar-i pa dang memelaba ya ‘ochimashi tulutiba’ lir, ta sorkar aitsü.
Parliament kima osangbenertem den jembidang Rahul-i, par party-i demonetization onük jembia iba indang jungkai adoktsüner, ajisüaka sorkari iba nungjagi jena aoer, ta ashi.
“House nung demonetization onük jembitsü atema ni maongka anguba mapang nung Ato kilonseri mena melitettsü. Linük ajunga nung pai o jembia senzür saka Lok Sabha nung arua shilem agitsü tsübur” ta India Ato Kilonser aija Rahul-i ashi.
Parliament nung longkak aita yimyim ayimba ajanga anogo 16 buba senden mekateti thinenba asoshi linük nüburtem dang tama taitok meshitsüla, ta sorkar-i ashiba sülen item o Congress lenir-i jembia liasü.
Gandhi-isa, tamasabo sorkari black-money indang jembi, iba sülen sen taila indang jembi aser tesüsa shidi sen mamshiba linük ka akumtsü atema inyaker, ta aitsü.
“Ni nüburtem dang Narendra Modi kisüng-i ochimashi tulutiba inyakba shinür, saka pa jenzüka dang senzür. Ni Parliament nung jembitsü parnoki melara, nenoki menoknok anokba angutsü,” ta paisa osangbenertem dang ashi.