Demonetisation onük nung PM Narendra Modi mejaoktsü: PAC

New Delhi, January 13 (Agencies): PAC Chairman K V Thomas tangatetba magii Hokolbarnü Parliament indang Public Accounts Committee (PAC)-i, demonetisation onük nung parnoki Ato kilonser, Narendra Modi mejaoktsü lemtetogo, ta metetdaktsü.
Tamalen Congress lenir, K V Thomas-i, demonetisation onük nung RBI telangzübatem agi melung mesüra Ato kilonser, Modi jaoktsüa akok, ta metetdakja liasü.
Sorkar tashi nung aliba party züngsemtemi Thomas-i jembiba oji aija liasü.
PAC-i sangdong ka ajanga, “Accounts asadangba dak sentakba nung kuli agütsütsü mesüra asüngdangyatsü atema Commiteee matsüngdang Minister tem mejaoktsü,” ta metetdaktsü.
“Ajisüaka nüngdakra o lemtepba sülen Chairperson-i Minister den jembitsü akok,” ta parnokisa ashi.
Thomas-i jembiba oji Nishikant Dubey, Bhupender Yadav aser Kirit Somaiya nunger densema BJP züngsemtemi aija, Ato kilonser jaoktsü atema iba committee dak tashi mali, ta ashi.
Tamalen Dubey-i shidi ka ajanga Lok Sabha Speaker dang, Thomas-i PAC matsüngdang Modi jaoktsüa akok ta jembibaji tim masü aser Parliamentary inyakyim nung mapet, ta metetdakja liasü.
Congress-i aniba UPA sorkar yimsüsüba mapang nunga, iba mapang nung PAC Chairperson, Murli Manohar Joshi-i 2G ochimashi ken o nung taoba Ato kilonser, Manmohan Singh jaoktsü lemtetba Congress züngsemtemi kanga ashishia liasü.
Tesülen Joshi-i iba telemtetbaji agien, kechiyong committee nungji sorkar tashi nung aliba teloktep züngsemtem timba liasü.