‘Demonetisation’ ya Modi-i yangluba lendong ka lir: Rahul

New Delhi, December 17 (Agencies): Tanü Congress tatong tir, Rahul Gandhi-i, sen 500 aser 1,000 notes anentsüba ya ‘Modi-i yangluba lendong’ ka lir, ta ashi.
Sangküm assembly election agitsü aliba state, Goa, Belgaum, nung election nüboyim sentong ka nung jembidang Rahul-i, “English oshi nung asenoki ‘man-made disaster’ ta jembiba ama sen tamshidak anentsüba ya ‘Modi-made disaster’ lir,” ta ashi.
Yashi Rahul-i BJP sorkar aija, “Tesüiba küm ana nung linük nütsüng shilem kati linük rongsen shilem 60 bendenogo,” ta jembia liasü.
Tanüa Rahul-i, iba sorkar ya India nunger nütsüng shilem ka, takartem atema sorkar lir, ta ashi.
“Congress-i Centre nung aliba suit asemba sorkar atsüngdoktsü atema inyaktsü,” ta Congress lenir Rahul-i ashi.
Rahul-isa, linük ya sen mamshiba linük ka akumtsü atema inyakbaji party-i manemer saka iba inyakyim ya sensakertem matsüngdang kangshia mebenoktsüla, ta ashi.
“Nüburtemi sen 100 rangben nguyaa alibaji parnoki payment atema card amshidangbo commission shilem 5-6 agütsütsüsa akumtsü. Shilem 5-6 ji Ato kilonser, Narendra Modi nunger medemer kanga takar shilem 1 ket-i aotsü,” ta paisa ashi.
Taoba Goa elections dak sentakba nung Rahul-i, par party-i takok ngua sorkar kümer sensakertem timtem onüktem atema inyaktsü, ta ashi.