‘Demonetisation’ ya nusotsü kangshiba ama lir: Ravi Shankar

New Delhi, December 17, 2016: Digital ajanga sen agutsütsü mapatong ajungketja tanü New Delhi nung Ministry of Electronics & Information Technology (MeitY)-i ayongzükba DigiDhan Mela  nung  Electronics & Information Technology and Law & Justice Union Minister, Ravi Shankar Prasad aser Science & Technology and Earth Sciences Union Minister, Dr. Harsh Vardhan nati chiyungtsü kar alia digital ajanga sen agutsüba noksa nung angur. 

New Delhi, December 17 (Agencies): Hokolbarnü Union Law Minister, Ravi Shankar Prasad-i, sen tamshidak anentsüba ya tanur asotsü kangshiba medem lir, ajisüaka tanur asoba sülen pelaba ama pelateptsü, ta ashi.
Delhi BJP indang Information Techonology-i ayongzükba sentong ka nung jembidang Union Ministeri iba o jembia liasü.
Prasad-isa, sorkari sen tamshidak anentsüba nükjidongji, linük nung sen khenyongi mamshitsü atema masü saka sen amshiba ajema akümtsü atema lir, ta ashi.
Parliament senden junga mekatetba atema pai opposition party tema aija liasü.
“Nüburtemi timtem tera ajurutsü. Saka iba tekangshi ya tetsür ka nusotsü atema kangshiba ama lir. Tatemsabo tanur sor mezüng ajepba angashidang pelaba ama pelatsü,” ta Prasad-i ashi.
Paisa, sen notes tejen bank tem nung deposit asübaji mita reprangtsü aser ajakji tashishitsü maketbabo masütsü, ta ashi.
Prasad-isa taoba Ato kilonser, Manmohan Singh-a aitsü.
“Nisung anati o jembitsü atema ni yongyaa liasü. Manmohan Singh aser Rahul Gandhi nati jembiba yongya liasü,” ta pai ashi.
Pai ashiba agi, bank tem nung sen deposit asübaji ajanga Indian army tashi itshitsü, aluyimertem nem teyari agütsütsü, tilateri shishilembartem yaritsü aser lenmang yanglutsü, ta ashi.
Sen tamshidak anentsüba ajanga Maoists telungpur aser kiralongrartemi timtem kanga ajurudar, ta minister-i ashi.
Kasa sentong nung Delhi BJP tongti, Manoj Tiwari-i, Arvind Kejriwal (Delhi Chief Minister) aser Akhilesh Yadav (Uttar Pradesh Chief Minister) ama yimtenren lenirtemi sorkar telemtetba ya anemer, ajisüaka iba telemtetba ajanga tajangzüktemji parnoki meteta lir, ta ashi.