Demonetization ajanga rongsenkettsüng ajemtsüa akok: SBI

New Delhi, June 11 (Agencies): Linük nung sen aputsür bank tulutiba, SBI-i, demonetisation ajanga maneni rongsenkettsüng jenjang ajema akumtsüa akok aser parnok maparen nung kongshitsüa akok, ta metetdaktsü.
Yaküm November 09 nungi tenzüka Centre sorkari sen 500 aser sen 1,000 notes anenja liasü aser iba melena sen 500 aser sen 2,000 notes tasen adok.
Centre sorkari telemtetba ajanga, tarutsü nung India rongsenkettsüng aser banking sector nung koma kongshitsüar mejangjar, ta SBI-isa metetdaktsü.
Tawa India nung demonetisation telemtetba ajanga bank indang business, operations aser senotsü jenjang kongshitsüa akok, ta SBI-i Preliminary Placement Document ajanga investors nem metetdaktsü.
State Bank of India (SBI)-isa, “Demonetisation ajanga India rongsenkettsüng jenjang ajema kümogo, aser maneni ajema akumtsüa akok, koba ajanga Bank indang business kongshitsü,” ta ashi.
SBI-isa, Preliminary Placement Document nungji risks aser tarutsü nung koma asütsüar mejangjabatem indang shia lir, ta ashi.
April 1 nungi associate bank pongu aser Bharatiya Mahila Bank loktepba sülen alima nung tematiba bank 50 rongnung SBI densemogo (2016 küm jenjang 55buba nung liasü).
SBI indang balance sheet size ji sen lakh crore 33 lir aser parbok indang bank branch 24,017 den ATM 59,263 ajanga customer crore 42 tenzüker.
Tawa osang ka ajanga, Yaküm Narendra Modi-i aniba Centre sorkari benokba demonetization ajanga India indang GDP ainba shilem 6.1 tashi ajema aluogo, ta sangdonga liasü.
Central Statistics Office (CSO) osang ajanga metetdaktsüba agi, 2016-17 küm tatemsabuba ita pezü nung India’er Gross Value Added (GVA) shilem 5.6 tashi ajema alu. 2015-16 küm India’er Gross Value Added (GVA) shilem 8.7 liasü.