Demonetization anema Tripura Congress unit-i longkak ait

Itanagar/Agartala, January 10 (Agencies): Hombarnü Tripura Congress unit-i Reserve Bank of India (RBI) Agartala office kima sen tasenba talila lemtsütsü asoshi kanga longkak aita nokdak.
Iba sentong nung Congress pusemertemi sensakertem, aluyimertem, mapa inyakertem aser mapa malirtem dak nungi ochimashi sen bendentsüba tenüng nung ato kilonser Modi-i parnok sen rakzüker, anungji pa mapa nungi anentsüla, ta RBI office kima aosu tazüng amer longkak aita nokdak.
“Ato kilonser Narendra Modi-i iba sentong ajanga ochimashiba sentem temai adokdaktsütsü, kiralongrar yariba anendaktsütsü aser sen tailatem, item amala tebilemtsütem ajak samatsütsü, aser anogo 50 tashi nungbo akhi amai inyaksangshi ajak meyipa arutsü ta nangzük,” ta taoba Lok Sabha züngsem aser Tripura AICC Coordinator Sardar Amzad Ali shibai iba longkak aitba sentong nung ashi.
“Modi latettsüba anogo süir sülena nüburtem maneni kangshir, aser item rongnung sensakertem talila kangshir. Congress party-i atakzüba anogo tashi ajemajema liogo saka temelenshi kecha maliba ajanga Ato kilonser sentong anema nokdaker. Congress-i iba tebilemtsü ya magien tashi maneni longkak aitsü,” ta pai maneni shisem.
Congress-i Agartala nung dang masü, saka state ajunga, sub-division tashi nung demonetization anema iba sentong tenzüka agidar. Nüburtem dang nangzükba ama mesüi BJP-i aniba government-i kanga mejungi tamakok anguba atema parnoki maneni aitsü.