‘Demonisation’ ajanga elections nung party ajangzüktsü: BJP; Election timi agitettsü atema Congress-i EC dang mepishir

New Delhi, January 04 (Agencies): State pongu nung assembly election agitsü atema tanü Election Commission-i sangdongbaji yimtenren party balala aikati pelaa agizükogo; ano külen BJP-ibo, sorkari ochimashi anema sen tamshidak anentsüba telemtetba agiba ajanga election nung party tajangzük angutsü imlar.
BJP National otongdar, GVL Narsimha Rao-i, “State elections ji talisa state sasep onüktem nung ajemdaker tokteper, ajisüaka tang linük tesem ajaklen BJP mopungsem ka lir, aser ibaji demonetization sülen reprangteter,” ta metetdaktsü.
“Tang mopungsem tulu ka lir. Anungji onoki state ajak nung takok angutsü imlar,” ta BJP otongdarisa ashi.
Iba atemaji tatishitsü ka agüja Rao-i, tawa agiba by-elections aser civic elections, talisa Gujarat aser Maharashtra state na nung party-i takok anguba indang ashi.
Pai ashiba agi, tang election agitsü aliba states- Uttar Pradesh, Uttarakhand, Punjab, Goa aser Manipur nung BJP ji kanga tongtibang asütsü.
Tamalenbo Manipur nung BJP tashi maliasü, saka tan by elections nungbo party-i junga inyaktetogo, ta paisa ashi.
Ano külen Congress otongdar tongti, Randeep Singh Surjewala-i, Uttarakhand aser Manipur densema election agitsü aliba state pongu nung par party-i ano kümsük ka yimsüstsü atema inyaktsü, ta shia assembly elections timi agitettsü atema inyakdaktsüner ta Election Commisssion dang mepishiogo.
“Tashiyim amshiba, sorkar tashi amshiba aser sen tashi tim mesüi amshiba mita reprangtsü ta onoki imlar, aser ibaji democracy atema tajung asütsü,” ta paisa metetdaktsü.
Ano külen Punjab aser Goa na nung shilem agitsü aliba party, AAP tongti aser Delhi Chief Minister, Arvind Kejriwal-ia, BJP sorkar tashi nung aliba state, Punjab aser Goa na nung tensa mejungi lir, aser taruba election nung nüburtemi AAP-i aniba ochishir sorkar aginer, ta ashi.
“Punjab aser Goa naprong nung tensa mejungi lir. Punjab nung nüburtemi BJP-i aniba sorkar atsüngdoker ochishir AAP sorkar aginer, kechiyong parnoki temesepba mozü aser ochimashi nungi talenba salaner,” ta Kejriwal-i ashi.
NDA teloktep nung aliba Shiv Sena nungi MP, Sanjay Raut-ia, election atema BJP terenemshiba temogo, talisa north tsütsü aliba state tem aser BJP-i yimsüsüba Goa nung terenemshiba junga kaogo, ta metetdaktsü.
“Shiv Sena-i tongtibang senden ka ayongtsü, kong party Tir mendenbuba ser tongtibang onüktem jembitsü. Elections atema onok terenemshiba tembangogo,” ta paisa ashi.
Tawa Samajwadi Party tongti, Mulayam Singh Yadav-i party nungi jentoksang, Naresh Agrawal-i Election Commission dang, voters tem temelung memelenshitsü atema Centre sorkari budget senden sangdonga aliba anogoji atsülangtsüla, ta mepishiogo.
Agarwal-isa, “Election mapang nung Budget senden ayongbaji shisadangang. Election timi agitettsü atema 2012 küm Budget senden atsülangshiba ama atsülangtsü atema onoki Election Commission dang asüngdangtsü,” ta metetdaktsü.
Ano külen Punjab Congress tongti, Amarinder Singh-i, state nung kenü yongi election agitsü atema EC-i telemtetba agiba pelaa agizükogo.
Singh-i, “Iba ya junger, onoki Akali-BJP teloktep aser AAP naprong madak takok angutsü, aser parnoki Punjab jenjangji angatettsü,” ta ashi.
UP nung Congress chief minister candidate aser taoba mapang Delhi Chief Minister, Sheila Dikshit-ia, mapang telemsa nung election atema inyaktsü aser takok angutsü atema tokteptsü, ta ashi.