Dempo SC-i taruba I-League nung shilem magitsü

New Delhi, December 07 (Agencies): Taoba mapang champions akümtsü jenjang 5 ben tashi ajangzüker telok, Dempo Sports Club (SC)-i India nung ayonga asayaba football asayamong tongtiba, 2016-17 I-League football asayamong nung shilem magitsü lemtetba osang ka tanü, Bodbar nü sangoktsüogo.
“Ozü teloki taoba ita ishika kanga junga shisadanga aruba sülen taruba I-League asayamong nung shilem magitsü lemtetba osang sasaseta sangdonger,” ta par teloki tanü sangoktsü.
“Küm 50 tejaklen nungi tenzüka, ozü teloki Goa League asayamong nung toktepa shilem agiba sülen tanü tashi Goa aser India ajunga nung football temaba jenjang nung ajungkettsütsü atema inyaka aruogo,” ta par teloki ashi saka par teloki kechi timtem ajanga taruba asayamong nung shilem magitsüsa aküm, iba osangbo memetetdaktsü.
National Football League (NFL) aser I-League takok marok 5 ben tashi agizükba aser India nung ayongba tongti football asayamong ajunga akokba densema, Dempo telok ya India ajunga nung taoba küm 15 tsüngda nung takokba timtiba ajangzükba telok lir.