Denmark-i Thomas Cup benogo nguogo

Kunshan, May 22 (Agencies) : Tan Thomas Cup final asaya nung Denmark-i 3-2 agi Indonesia koka Europe nung aliba linük rongnung iba marok abener mezüngbuba linük kümogo.
Indonesia-i tarep asayaba anaprongla akok ajisüaka Viktor Axelsen , Jan Jorgensen aser Hans-Kristian Vittinghus nungeri kija asaya ajak akokba ajanga Denmark-i 13 ben champion bena aliba telok madak takok tulu angu.
Vittinghus-i line ponglanglen smash ka züklokja pa asayasang madak takok angu aser ibaji ajanga Kunshan Sports Centre, China Jiangsu province nung Denmark nunger anenzükba camp nung kanga pelatep.
Arishi küm 30 tain, Vittinghus-i 21-15 21-7 agi Ihsan Maulana Mustofa madak takok anguba mapang külem asayartem tepela nüktzü atsünger pa longbanga pelatep.
Mezüng kija asayaba nung Axelsen-i gondha ka majungdang Tommy Sugiarto madak  21-17 21-18 agi koka Denmark atema tetenzük kanga azüa tenzüka yutsü.
Mezüng asaya temer külen tanabuba kija asaya tatemlen Sugiarto-i atonga atonga point trok ngua takok angu.
Tarep asaya nung Indonesia nungi Mohammad Ahsan aser Hendra Setiawan nati 21-18 21-13 ngua Denmar nungi Mads Pieler Kolding aser Mads Conrad Petersen na madak takok angu. Ano Angga Pratama aser Ricky Karanda Suwardi natia tanabuba tarep asaya nung takok angu.