Denmark nung Prannoy-i Lee Chong Wei tsükdaktsü

Odense, October 20 (Agencies): Olympic silver medal asemben tashi angur Lee Chong Wei madak India nunger badminton asayar H S Prannoy-i anabenbuba takok nguogo aser Saina Nehwal, Kidambi Srikanth nungera tang tasaidak Denmark Open Super Series Premier quarterfinals-i iogo.
Ita pezü süyiogo, Indonesia Super Series Premier nung Prannoy-i Chong Wei ya straight games nung akok aser Hokulbarnü asayaba nunga pai taoba World No. 1, Malaysia nungba ya 21-17, 11-21, 21-19 agi akok. Tena tsüngta iba asaya ya ghonda ka ser minute asem asaya liasü.
Arishi küm 25 tain Prannoy aser Honibarnü arishi küm 35 ajungsang Chong Wei na ya asemben asaya lir aser Prannoy-i anaben aser Chong-i khen koka lir.
Mezüng asaya nung 10-7 agi Prannoy temaba liasü saka taoba World No. 1-i asaya yimya melenshia meneba aküm. Iba set nung mapang ka bo 14-13 agi Chong Wei temeba liasü saka Prannoy-i jump smash ka yoktetba sülenbo pa temaba sür asaya tembang.
Tanabuba game nung tenaprongi ‘unforced errors’ mena. Video referral nung Prannoy-i koka Chong Wei madak 4-3 agi timba liasü. Iba sülen India nungbai net nung ishiben malokja Malaysia nungba ya 8-6 agi timba aküm. Prannoy-i unforced errors aika menaba ajanga Chong Wei ya 11-8 agi timba kümdaktsü.
Chong Wei-i 14-8 agi timba lia Prannoy-i tashi agi malokja point ana ngutet. Saka India nungbai aiben aibelenba ajanga Chong Wei-i iba game kokteta decider asayatsüsa aküm.
Asembuba game nung Chong Wei-i 5-2 agi timba liasü saka pai baseline nung anaben aibelena magizük yotsüba sülen Prannoy-i ajateta 6-8 aküm. Mapang ka bo tena points 10-10 liasü.
Iba sülen Chong Wei-i points kar nguteta 13-10 agi timba aküm saka Prannoy-i points ti maneni nguteta 18-13 aküm. Saka India nungbai service nung aibelena Chong Wei-i points ana nguteta 15-18 aküm.
Iba sülen Prannoy-i tera mükemdangi asayaba ajanga Chong Wei-i points pezü ngutet saka India nungbai cross court smash ka malokja match point ngutet aser akok.