Denmark nung sayutsüngir 6 nokdanger

Stockholm, May 2 (Agencies): Mongulbarnü Denmark-i bendanger sayutsüngir trok tashi nokdangogo. Parnoki tesempatep adoktsü atema sayutsüngir ta tai tonglokja küm ana atema nokdang.
Sayutsüngirtem rongnung Muslim nunger 5 aser American Evangelical pastor ka lir.
Parnokji Saudi nunger 2, Canada nunger ka, Syria nunger ka aser America nunger ana lir. America nunger rongnung 2011 küm Koran rongdoktsüba pastor Terry Jones dena lir.
“Denmark nung democracy aser nüjiso o meimchir temeten indang telatetbatem anema sayutsüngirtem magizüker ta iba tenokdangba ajanga sayur” ta Immigration & Integration ministry sangdong ka nung metetdaktsü.
May 2016 nung Denmark sorkari tamangba yimsü tsütsü talila bilemloka oa inyakertem bushitsü aser parnok nokdangtsü atema osang metetdaktsü.
Denmark nung aliba mosque tem nung hidden-camera documentary ka ajanga sayutsüngirtemi tesempatep adoktsü atema tesayuba agütsütsü kuli anguba sülen sorkari iba telemtetba ya agi.
Palestine nung asor Denmark lanur ka tepuokdak ayudang tangartemi tesayuba tai sayu aser 2015 küm pai Copenhagen nung Islam aser free speech o atsütepba sentong ka nung Danish filmmaker ka tepset aser iba sülen synagogue ka nung Jewish security guard ka tepset.
2015 nungsa Morocco nunger kati al Qaeda den tesentaktep alir putir kati züluba kakettem prokshiba atema tai tongloktsü aser 1988 küm pai Denmark senso ngur aliba meyipa agien.
2005 küm Denmark osangkaket Jyllands-Posten-i Prophet Mohammed indang cartoon tem adokba sülen Muslim nungertemi iba linük anema ola adoka liasü.