Denmark tsür raksatsüba ken o nisung 5 akumli piyong tepoukdak ayutsü

New Delhi, June 10 (Agencies): Arishi küm 52 Denmark tsür ka pua tashiyim amshia taküm raksatsüba ken o nung Hokolbarnü Delhi nung aliba court kati aibelener nisung pongu taküm piyong tepoukdak ayutsü obendang agütsüogo.

2014 küm atalokba ken o nung aija alirtem nem obendang agütsüdang additional sessions judge, Ramesh Kumar-i, “Mapa tamajung atema aija alirtem taochi angutsü metemsü,” ta metetdaktsü.

Iba mapang tamajung ajanga linük tenüng menüktsüogo, ta paisa ashi.

Iba ken o nung June 6, 2016 nü court-i nisung ponguji Indian Penal Code (IPC) kübok sections 376 (D) teloki tashiyim amshia raksatsüba, section 395- hadir amer auyaba, section 366- nisung apuba, section 342- tashiyim amshia nisung sota ayuba, section 506- ozüng alema ambangyima inyakba aser section 34- nükjidong kasa yur inyakba ken otem nung aija liasü.

Iba ken o nung aitsür tebur ponguji arishi küm 27, Mahendra alias Ganja, Mohd Raja (23), Raju (24), Arjun (22) aser Raju Chakka (23) nunger lir.

Kasa ken o nung tai tonglokja alir nisung asembo arishi küm 18 tekübok lir, aser India nungbo parnokji tanur ta züngshir asünungji parnok atema ken o bo juvenile court nungang akatsü.

Tanü ken o metenzükdang obendangeri tuyuba nung ajemdaker aija alirtemji court takdang nungi anitetba sülen police-i parnok ket nung alibatem repranga liasü.

2014 küm January 14 aonung arishi küm 52 tain Denmark tsür raliwalir kaji tebur telok kati tashiyim amshia raksaja liasü.

Iba aonungji aibelenertem jagi tetstürlaji New Delhi Railway Station anasa aliba Divisional Railway Officers’ Club tesem tezülen kati anir oa la dak tashiyim mapa benshia liasü.