Deo Nukhu-i ‘foreign trade’ shisadokten lapoktsü

Kohima, May 03 (TYO): May 03, 2017 nü Hotel Acacia, Kohima nung Confederation of Indian Industry-i ayonga ‘Opportunities and challenges in Foreign Trade’ seminar ka kaogo, aser tetenzük sentong nung tongti tesemdangerji Higher & Technical Education Nagaland Parliamentary Secretary, Deo Nukhu liasü.
Tongti tesemdanger o jembidang pai entrepreneurs aser shishilembartem dang, Nagaland aser Northeast terenlok atema local products export aser import nung rangloker inyaktsüla, koba ajanga alima jenjang nung tangar dena tokteptettsü, ta ajungshi.
Iba dak sendakba nung pai tim department aser agency tem dang, item ama products tangaleni yoktettsüsa global markets bushitsü ajungshi.
India sorkar mapatongji Myanmar ajangdanga India aser Thailand na International highway agi sendakteptsü aser tayimtsü connectivity atema inyaker, ta metetdakja Deo Nukhu-i, entrepreneurs aser shishilembartem atema shishilembaba jenjang aintsüji ana nung lir, ta metetdaktsü.
Tang tagidak seminar ya tenük lapoktsüba seminar ka lir, ta shia Deo-i, iba ya ajanga tongtibang sendaktepa alirtemi international shishilembaba, talisa South East Region indang onük balala rajema akümtsü imlar, ta ashi.
Vety & Animal Husbandry Government of Nagaland, Commissioner & Secretary, M.K. Mero-ia, agri aser horti aluyimtsü atema Northeast nung temo aketba ali peria jenti lir, anungji item nungji rangloktsüla, ta metetdaktsü.
Export Import Bank of India General Manager, Deepali Agarwal-i okila jembia liasü aser CII züngsem aser Managing Director, Clairvoyance Technology, Neisakholie-i lokti pelaa agizük.
Iba sentong tembanga Regional Head EXIM Bank, Anirudha Barooah-i tepela anküp o jembia liasü.